“ყველას ვურჩევდი, პირველ რიგში საკუთარ ქვეყნებში არსებულ მდგომარეობაზე იზრუნონ და თავი დაანებონ დეზინფორმაციის გავრცელებას”

საპარლამენტო უმრავლესობის ერთ-ერთმა ლიდერმა, იურიდიული კომიტეტის თავმჯდომარემ არჩილ გორდულაძემ ევროკომისიის მიერ გამოქვეყნებულ კვლევაზე ისაუბრა.

მისი თქმით, ევროკავშირის წევრ ქვეყნებში მთავრობების მიმართ ნდობა მინიმუმზეა, საქართველოში კი მოქალაქეების აბსოლუტური უმრავლესობა მმართველ გუნდს ენდობა.

“მაშინ, როდესაც ევროკავშირის წევრ ქვეყნებში, განვითარებულ ეკონომიკის მქონე წევრ ქვეყნებში მთავრობისადმი ნდობა არის აბსოლუტურ მინიმუმზე ჩამოსული, ჩვენს ქვეყანაში საქართველოს მოქალაქეების აბსოლუტური უმრავლესობა ენდობა ჩვენს გუნდს და ჩვენს ხელისუფლებას. მაგრამ, ამ ქვეყნების წარმომადგენლები და ბიუროკრატიაში გაერთიანებული პირები, თავს ესხმიან როგორც ჩვენს გუნდს, ასევე მისი აღმატებულება, ქართველი ხალხის არჩევანს და არ სცემენ პატივს ქართული საზოგადოების პოზიციებს. ერთი მხრივ, სახეზეა და აშკარაა ფაქტები, მეორე მხრივ, აღქმების შექმნის მცდელობები, რომლითაც დაკავებულები არიან სხვადასხვა ძალის წარმომადგენლები. ყველას ვურჩევდი, რომ პირველ რიგში საკუთარ ქვეყნებში არსებულ მდგომარეობაზე იზრუნონ და თავი დაანებონ დეზინფორმაციის გავრცელებას საქართველოს მიმართ”, – აცხადებს არჩილ გორდულაძე.

ევროკომისიის კვლევის შედეგები მსოფლიო ბანკმა გლობალური მმართველობის ინდიკატორების ფარგლებში გამოაქვეყნა. “ევრო ბარომეტრის” შეფასების 100%-იანი სისტემით, საქართველოს მთავრობამ ახალი ისტორიული მაქსიმუმი 54% მიიღო და ევროპის საუკეთესო ხუთეულში ლუქსემბურგთან, დანიასთან, მონტენეგროსთან და ავსტრიასთან ერთად მოხვდა.

მმართველ გუნდში ამბობენ, რომ მაშინ, როდესაც ევრო ბიუროკრატების მხრიდან ხშირად ისმის განცხადებები საქართველოს მთავრობისა და ხალხის დაყოფაზე, ევროკომისიის კვლევით დასტურდება, რომ ქართველი ხალხი სწორედ საქართველოს მთავრობას ენდობა. იხსენებენ ოპოზიციის ლობისტების განცხადებებსაც, მათ შორის ჯო უილსონს, რომელიც უაპელაციოდ ამტკიცებს, რომ ქართველი ხალხისა და ხელისუფლების ინტერესები არ ემთხვევა.