“ჩვენ მხარს ვუჭერთ უკრაინის ტერიტორიულ მთლიანობას და სუვერენიტეტს, თუმცა ბევრი მცდელობა ვნახეთ, რომ საქართველო ყოფილიყო სხვა კუთხით დანახული”

საქართველოს აქვს თანმიმდევრული პოზიცია. საქართველოს პოზიცია არსად არ შეცვლილა, არც ერთ ეტაპზე. როდესაც ჩვენ ვსაუბრობთ უკრაინის მხარდაჭერაზე, პოლიტიკურ მხარდაჭერაზე, როდესაც ჩვენ ვსაუბრობთ საერთაშორისო სამართლის ნორმების მხარდაჭერაზე, ბუნებრივია, აქ საქართველოს პოზიცია ვერ იქნება განსხვავებული, – განაცხადა საქართველოს ვიცე-პრემიერმა, საგარეო საქმეთა მინისტრმა, მაკა ბოჭორიშვილმა „იმედი LIVE“-ის ეთერში.

მინისტრის განცხადებით, საქართველო მხარს უჭერს უკრაინის ტერიტორიულ მთლიანობას და სუვერენიტეტს, თუმცა იყო მცდელობები, რომ საქართველოს პოზიცია სხვაგვარად წარმოჩენილიყო ან საქართველოს აღნიშნული პოზიციის გაჟღერების შესაძლებლობა არ მისცემოდა.

„ჩვენ მხარს ვუჭერთ უკრაინის ტერიტორიულ მთლიანობას და სუვერენიტეტს და ბუნებრივია, რომ ჩვენ ამ პოზიციას ვაჟღერებთ ყველგან და გავაჟღერებთ. ამაში ახალი არაფერია. ამ პოზიციით პოზიციონირებს ჩვენი ქვეყანა წლების განმავლობაში და ასე გააგრძელებს, თუმცა ბევრი მცდელობა ვნახეთ, რომ საქართველო ყოფილიყო სხვა კუთხით დანახული. ბევრი მცდელობა ვიხილეთ ჩვენ ბოლო 5 წლის განმავლობაში, რომ საქართველოსთვის სხვადასხვა ტიპის იარლიყი მიეკარებინათ. ამ მცდელობების ნაწილი იყო საქართველოს ასე ვთქვათ გარიყვის პოლიტიკაც, რაც სასაცილოა ერთი მხრივ, მაგრამ მეორე მხრივ ფაქტია, რომ საქართველოს ძალიან ბევრ ადგილას არ იწვევდნენ, რომ არ გვქონოდა შესაძლებლობა ჩვენი პოზიციის გაჟღერების, იმისათვის, რომ კომფორტულად ეშენებინათ ნარატივები“, – განაცხადა უწყების ხელმძღვანელმა.

საგარეო საქმეთა მინისტრის განცხადებით, მსგავს ქმედებებს თავისი მიზეზები ჰქონდა და დღეს უკვე ნათელია, თუ რა საფრთხეების წინაშე იდგა და დგას საქართველო, რეგიონში არსებული ვითარების გათვალისწინებით.

„ჩვენ ამაზე არაერთხელ გვისაუბრია, თუ რა ინტერესები არსებობდა საქართველოსთან მიმართებით. დღეს ალბათ ამაში ეჭვი ნაკლებად შეიძლება ვინმეს შეეპაროს, თუ რამდენად რეალური იყო ის საფრთხეები და არც არსად წასულა საფრთხეები, ვიდრე ეს დაძაბულობა არის რეგიონში და მიმდინარეობს ომი. ჩვენ, რა თქმა უნდა, ძალიან ფრთხილად უნდა ვიყოთ ჩვენს პოზიციონირებასთან დაკავშირებით და ჩვენს მოქმედებებთან დაკავშირებით, იმისათვის, რომ ჩვენ ქვეყანას არ შეექმნას უსაფრთხოების დიდი გამოწვევები“, – აღნიშნა მაკა ბოჭორიშვილმა.