ჩეხეთის პრეზიდენტმა, პეტრ პაველმა განაცხადა, რომ რუსეთსა და უკრაინას შორის ცეცხლის შეწყვეტა „ძალიან ახლოს“ იყო, ვიდრე აშშ-ის პრეზიდენტი დონალდ ტრამპი რუსული დიზელის საწვავზე სანქციებს გააუქმებდა.
პაველის თქმით, აშშ-ისა და ევროპის კოორდინირებული სანქციები რუსეთს „რთულ მდგომარეობაში“ აყენებდა.
„ახლა ბევრად რთული იქნება. რუსეთი ამ იმპულსს ზეწოლისგან თავის დასაღწევად იყენებს“, – აღნიშნა პაველმა.
ჩეხეთის პრეზიდენტმა ვოლოდიმირ ზელენსკის მიმართ მხარდაჭერაც გამოხატა. პაველის შეფასებით, დონალდ ტრამპმა რუსეთის მიმართ უფრო ღია მიდგომა გამოავლინა, ვიდრე ნებისმიერმა ევროპელმა ლიდერმა.
„გარკვეულწილად, შესაძლოა, მას ვლადიმერ პუტინი ავტორიტეტული ლიდერის სახით იზიდავს, მაგრამ არ მგონია, პრეზიდენტი ტრამპი ამას დემოკრატიასა და ავტოკრატიებს შორის ბრძოლის პოზიციიდან უყურებდეს, რადგან მისთვის მთავარი აშშ-ის ეკონომიკური კეთილდღეობაა“, – აღნიშნავს ჩეხეთის პრეზიდენტი.
პაველი შეთანხმებას „შეცდომას“ უწოდებს და არ გამორიცხავს, რომ მომავალში ევროპა რუსულ ნავთობს კვლავ იყიდის, თუმცა ამბობს, რომ ამას დრო დასჭირდება.
„ერთ დღეს რუსეთი თუ გახდება ქვეყანა, რომელიც პატივს სცემს სხვა ქვეყნების სუვერენიტეტსა და საზღვრებს, მაშინ რატომ არ უნდა შევინარჩუნოთ ნორმალური საქმიანი ურთიერთობები ასეთ ქვეყანასთან? თუმცა რუსეთს ჯერ არ მიუღწევია ამ დონემდე“, – განაცხადა პაველმა.