აშშ-ის სახელმწიფო მდივნის მარკო რუბიოს განცხადებით, ომის დასრულების შემდეგ უკრაინისთვის შეთავაზებული უსაფრთხოების გარანტიები რუსეთისთვისაც მისაღები უნდა იყოს.
მისი თქმით, მსგავსი შეთანხმებები რუსეთ-უკრაინის ომის დასრულების მიზნით მოლაპარაკებების გზით მიღწეული სამშვიდობო შეთანხმების მნიშვნელოვანი წინაპირობა იქნება.
„ვფიქრობ, ამ საკითხზე საბოლოო, კონკრეტულ გეგმაზე ჯერ არ შევჯერებულვართ და არ განგვიხილავს, როგორი შეიძლება იყოს ის. განხილულია გარკვეული კონცეფციები იმის შესახებ, თუ როგორი შეიძლება იყოს უსაფრთხოების გარანტიები კონფლიქტის დასრულების შემდეგ. ეს საკითხი კვლავაც აქტუალურია, რადგან, ჩემი აზრით, ის ომის საბოლოოდ დასრულებისთვის გადამწყვეტი იქნება. აუცილებელია, არსებობდეს გარანტია, რომ უკრაინა ომის შემდეგ თავს უსაფრთხოდ იგრძნობს. ცხადია, ეს ისეთი შეთანხმება უნდა იყოს, რომელსაც რუსეთიც დაეთანხმება, რათა მან იმუშაოს“, – განაცხადა სახელმწიფო მდივანმა.
რუბიომ კიდევ ერთხელ აღნიშნა, რომ უსაფრთხოების გარანტიები გადამწყვეტი მნიშვნელობის იქნება იმისთვის, რომ კიევი შესაძლო სამშვიდობო შეთანხმებას დათანხმდეს.
ჟურნალისტის კითხვაზე, შეუძლია თუ არა შეერთებულ შტატებს მსგავსი გარანტიების ხელშეკრულებით გაფორმება, რუბიომ ეს შესაძლებლობა არ გამორიცხა.
„შესაძლოა, თუმცა არ ვიცი, საკითხი უკვე ამ დონეზე დეტალურად განვიხილეთ თუ არა“, – განაცხადა მან და ყურადღება გაამახვილა იმ სირთულეებზე, რომლებიც აშშ-ის სენატში საერთაშორისო ხელშეკრულებების დამტკიცებას უკავშირდება.
რუბიოს განცხადებები წინ უძღვის 10-11 ნოემბერს აბუ-დაბიში დაგეგმილ სამშვიდობო მოლაპარაკებებს, რომელთა ორგანიზატორიც შეერთებული შტატებია. კრემლის ინფორმაციით, მოლაპარაკებებში მონაწილეობისთვის რუსეთი მაღალი რანგის დიპლომატებსა და სამხედრო წარმომადგენლებს გაგზავნის.