„ქართული მარშის“ პროტესტესტზე, მიწის უცხოელებზე გაყიდვასთან დაკავშირებით, საპარლამენტო უმრავლესობის ლიდერმა არჩილ თალაკვაძემ გადაცემაში „პოლიტმეტრი“ ისაუბრა. როგორ თალაკვაძემ განაცხადა, მოძრაობის მიზანია, გარკვეულმა ადამიანებმა კახა კალაძის ხარჯზე მოიპოვონ პოპულარობა. მისივე თქმით, მმართველი გუნდის პოზიცია ყველასთვის ნათელია, რომლის მიხედვით, მიწა უცხოელებზე არ გაიყიდება. თალაკვაძე დასძენს, რომ ეს სწორედ „ქართული ოცნების“ ინიციატივა იყო.
„მე ვფიქრობ, რომ ეს არის მცდელობა გარკვეულმა ადამიანებმა კახი კალაძის ხარჯზე მოიპოვონ პოპულარობა, მასთან ერთგვარი ხელოვნური შეპაექრებით, თუნდაც მიწის საკუთრების საკითხთან დაკავშირებით, რაღაც ადგილი მოხაზონ პოლიტიკაში. მაგრამპოლიტიკა რომელიც დღეს არის ჩვენ თვალწინ, ეს არის პოლიტიკური პარტიების და მათი მხარდამჭერი ადამიანების, ხალხის პოლიტიკა. ამ პოლიტიკაში ძალიან ცოტა ადგილია ისეთი ძალებისთვის, რომელთაც სწორედ წინასაარჩევნო დღეებში, თუნდაც კახი კალაძის ოფისის წინ ახსენდებათ მიწის საკუთრების საკითხი.
მე ძალიან მკაფიოდ და სრული პასუხისმგებლობით გავიმეორებ, რომ სასოფლო სამეურნეო მიწებთან დაკავშირებული რეგულაციები, მისი გასხვისების აკრძალვა უცხოელებზე, ქართული მიწის, როგორც განსაკუთრებული რესურსის დაცვა, ეს არის ჩვენი გუნდის ინიციატივა, ეს არის სწორედ ჩვენს მიერ ჩაწერილი ახალ კონსტიტუციაში და ეს არის სწორედ ჩვენს მიერ დაყენებული საკითხი, ჩვენი ეროვნული ინტერესების შესაბამისად. ამიტომ გამოსვლა იმ განცხადებით, რომ თითქოს ჩვენ ვყიდით ქართულ მიწას – არის უპასუხისმგებლო განცხადება. ეს არის ძალიან იაფფასიანი მცდელობა, რომ გარკვეულმა ადამიანებმა კახი კალაძის ხარჯზე მოიპოვონ გარკვეული ყურადღება წინასაარჩევნო პერიოდში. სხვანაირად ახსნა ვერ მოეძებნება იმ ფაქტს, რომ ეს ადამიანები არ შეიკრიბნენ პარლამენტთან, არ შეიკრიბნენ სხვაგან, სადაც ამ საკითხზე განხილვები მიმდინარეობდა. შეიკრიბნენ სწორედ კახი კალაძის შტაბის წინ, და სამწუხაროდ გვიან აღმოაჩინეს, რომ ჩვენ ყველანი ამ დროს ვიმყოფებოდით შეხვედრებზე მოსახლეობასთან და სწორედ მათ ვესაუბრობოდით ქართული მიწის, როგორც განსაკუთრებული რესურსის დაცვაზე. ეს, რა თქმა უნდა, არის ის, რაც ჩვენს პოლიტიკურ დღის წესრიგშია და არა იმ ადამიანების მოწოდებები და ინიციატივები, რომლებიც კახი კალაძის შტაბთან იყვნენ შეკრებილი“, – განაცხადა არჩილ თალაკვაძემ.