„კალაძეს ზოგიერთი პოლიტიკოსის მხარდამჭერთა რაოდენობის თასი სახლში უდევს”, – ასე უპასუხა ფეხბურთის ფედერაციის პრეზიდენტმა ლევან კობიაშვილმა თეა სიჭინავას კითხვას – ხომ არ უქმნის წინასაარჩევნოდ უხერხულობას ვარსკვლავების მატჩის ორგანიზება ფეხბურთის ფედერაციას.
„სხვა ქვეყნებში ეპატიჟებოდნენ კახის, როცა ასეთი მატჩი ტარდებოდა. იქ ჩადიოდა და თამაშობდა. ჩემთვის წარმოუდგენელია, როცა თავის ქვეყანაში ჩამოდიან ასეთი დონის ვარსკვლავები, კახიმ არ ითამაშოს იმიტომ, რომ გაურკვეველი წარმოშობის პოლიტიკოსების აზრით, მას ამის უფლება არ აქვს. ეს წარმოუდგენელია. ვერცერთ კანონში ვერ ვნახავთ, რომ მერობის კანდიდატს საქველმოქმედო მატჩში მონაწილეობის უფლება არ აქვს”, – ამბობს კობიაშვილი „ქრონიკასთან” ინტერვიუში.
საქველმოქმედო მატჩში „მსოფლიოს ვარსკვლავები საქართველოსთვის” 29 სექტემბერს, 21:00 საათზე, დინამო არენაზე გაიმართება.
უკვე ცნობილია, რომ თბილისს მსოფლიო ფეხბურთის ისეთი ვარსკვლავები ესტუმრებიან, როგორებიც არიან: ფრანჩესკო ტოტი, კარლეს პუიოლი, რივალდო, დიდა, ანდრეი შევჩენკო, ხავიერ ძანეტი, ზვონიმირ ბობანი, სერჟინიო, პაოლო მალდინი, ლუკა ტონი, ერნან კრესპო, ვინსენტ კანდელა, მარეკ იანკულოვსკი, ალესანდრო კოსტაკურტა, დემეტრიო ალბერტინი, დინო ბაჯო, მასიმო ამბროზინი, მასიმო ოდო, მარკო დელვეკიო, სებასტიან ფრეი, ანჯელო დი ლივიო, ენრიკო ანონი, კრისტიან აბიატი, სებასტიანო როსი, ჯუზეპე ფავალი, მაურო ტასოტი, ანჯელო კარბონე, ივან კორდობა, დარიო შიმიჩი, იბრაჰიმ ბა და პიეტრო ვერხოვოდი.
მათთან ერთად თბილისის მერობის კანდიდატი კახა კალაძეც ითამაშებს.
მატჩიდან შემოსული თანხა, მიმდინარე წლის ზაფხულში ხანძრის შედეგად დაზარალებული ბორჯომის ტყის აღდგენას მოხმარდება.
/imedinews.ge