გვინდა ჩვენი მთავრობის სახელით გითხრათ – ჩინეთს შეუძლია ყოველთვის იქონიოს იმედი, რომ საქართველო იქნება ძალიან სანდო პარტნიორი, – ამის შესახებ საქართველოს პრემიერ-მინისტრმა გიორგი კვირიკაშვილმა სავაჭრო ცენტრის „ჰუალინგი თბილისის ზღვის პლაზას” გახსნის ცერემონიაზე სიტყვით გამოსვლისას განაცხადა.
როგორც პრემიერმა აღნიშნა, საქართველო იყო ერთ-ერთი პირველი ქვეყანა, რომელიც ჩაერთო ჩინეთის პრეზიდენტის ინიციატიით დაწყებულ პროექტში – ” ერთი სარტყელი – ერთი გზა”, რაც ქვეყნებს შორის ურთიერთობებისა და ინიციატივების განვითარების სრულიად ახალი ეტაპის დასაწყისია.
მისივე თქმით, სულ მალე ჩვენს დედაქალაქში ჩატარდება თბილისის აბრეშუმის გზის ფორუმი, სახელწოდებით – “თბილისის ფორუმი ერთი სარტყელი – ერთი გზა”.
“ეს ფორუმი საშუალებას მოგვცემს კიდევ უფრო გავამყაროთ კავშირები ჩინეთსა და საქართველოს შორის და საშუალებას მისცემს საქმიანის წრეების წარმომადგენლებს, განიხილონ ახალი პროექტები, რაც ვფიქრობთ, რომ რეგიონში კიდევ უფრო მეტი მშვიდობისა და სტაბილურობის გარანტი იქნება”, – განაცხადა კვირიკაშვილმა.
მისივე თქმით, საქართველოს ძალიან მნიშვნელოვანი გეოგრაფიული ადგილმდებარეობა აქვს რეგიონში და ასევე ძალიან მიმზიდველი ეკონომიკური გარემო უცხოური ინვესტიციებისთვის.