„ქართული ოცნების“ თბილისის მერობის კანდიდატმა კახა კალაძემ „TV პირველის“ გადაცემა „რეაქციაში“ საუბრისას განაცხადა, რომ მისთვის გაუგებარია, რატომ უნდა დაჯდეს სადებატოდ ალეკო ელისაშვილთან და არა კახა კუკავასთან ან გუგავასთან.
„მერობის 7 ოპოზიციური კანდიდატია, რომლებიც ჩართულები არიან საარჩევნო პროცესში და რატომ უნდა დავჯდე ელისაშვილთან სადებატოდ?! ან რატომ არ უნდა დავჯდე კახა კუკავასთან ან თუნდაც გუგავასთან?!
არსებობს ფორმატი, რომლის შემოთავაზებაც გაკეთებული აქვთ ტელევიზიებს და შესაბამისად, ჩვენ ვიღებთ მონაწილეობას ამ დებატებში. არც ერთ დებატს არ გავქცევივართ.
რაც შეეხება მოსახლეობასთან შეხვედრებს, მე ყოველდღიურ რეჟიმში ვხვდები მათ და ვსაუბრობთ არსებულ პრობლემებზე, ვესაუბრებით მოსახლეობას თუ როგორ უნდა მოვაგვაროთ პრობლემები“, – განაცხადა კახა კალაძემ.
როგორც ალეკო ელისაშვილმა პრესკონფერენციაზე განაცხადა, ალეკო ელისაშვილი კახა კალაძეს დებატებში იწვევს.