საგანგებო სიტუაციების მართვის სამსახურის ცნობით, თბილისში, დედოფლისწყაროს ქუჩაზე ჩამოინგრა ბარაკული ტიპის სახლის კედელი. შემთხვევის შედეგად არავინ დაშავებულა.
უწყების ცნობით, თბილისში, დიდ დიღომში, ქარმა რესტორან “რიტორს” სახურავი გადახადა, დაზიანდა მაღალი ძაბვის კაბელი.
ასევე, დიდ დიღომში, ხატაეთის ქუჩაზე, სახანძრო-სამაშველო სამსახურმა აყრილი თუნუქის ფურცლები მოხსნა. ამ დროისათვის საფრთხე მოხსნილია.
საგანგებო სამსახურის ცნობით, ძლიერი ქარის გამო, საქართველოში სახანძრო-სამაშველო გამოძახების მოთხოვნით ჯამში 200-მდე ზარი განხორციელდა.
უწყების ცნობით, 123 ზარი განხორციელდა თბილისიდან, ხოლო 75 სხვადასხვა რეგიონიდან.
„თბილისში, სახანძრო-სამაშველო სამსახურის გამოძახების ყველაზე მეტი ფაქტი დაფიქსირდა დიდ დიღომში, დიღმის მასივში, საბურთალოზე, ისნისა და სამგორის რაიონებში.
მოქალაქეები, ძირითადად, შენობა-ნაგებობების დაზიანების, ხეების წაქცევის, ბილბორდებისა და ელექტრობოძების დაზიანების შესახებ ახორციელებდნენ ზარებს“, – აღნიშნულია საგანგებო სიტუაციების მართვის სამსახურის ინფორმაციაში.