აშშ-ს 6 ქალაქში ქვევრის ღვინის დეგუსტაციები იმართება. ღვინის ეროვნული სააგენტოს ცნობით, დეგუსტაციებზე წარმოდგენილია მცირე მარნები: „იაგოს ღვინო“, „ოქრო ღვინოები“, „ხოხბის ცრემლები“, „მარიამ იოსებიძე“ და „რამაზ ნიკოლაძის ღვინის მარანი“. ქართველი მეღვინეები საკუთარ ღვინოებს აშშ-ში თავად წარადგენენ.
”აღსანიშნავია, რომ ქართული ღვინის დეგუსტაციები ტარდება საქართველოს მეღვინეობის 8-ათასწლიან ტრადიციებზე გადაღებული დოკუმენტური ფილმის “ჩვენს ძარღვებში ღვინო სჩქეფს“ (OUR BLOOD IS WINE) ჩვენების ფონზე. ფილმის რეჟისორია ამერიკელი კინორეჟისორი ემილი რელსბეიკი (Emily Railsback). ფილმის ხანგრძლივობაა 78 წუთი და მისი პრემიერა ბერლინის საერთაშორისო კინოფესტივალზე შედგა.
დეგუსტაციებზე, ღვინოსთან ერთად, წარმოდგენილია ქართული სამზარეულოც.
ქართული ღვინის დეგუსტაციები უკვე ჩატარდა ლოს-ანჯელესში და სან-ფრანცისკოში, დღეს პორტლენდში გაიმართება , ხოლო მომდევნო დღეებში ვაშინგტონში, ჩიკაგოსა და ნიუ-იორკში.
ქართველი მეღვინეები აშშ-ში იმყოფებიან ნატურალური ღვინოების იმპორტიორის, კრის ტერელის (Christopher Terrell) მიწვევითა და ორგანიზებით, ასევე ღვინის ეროვნული სააგენტოს ხელშეწყობით”, – ნათქვამია ინფორმაციაში.