თბილისის სატრანსპორტო კომპანიამ მეტროპოლიტენის მემანქანეების ნაწილის გაფიცვის გამო ოფიციალური განცხადება გაავრცელა, რომელშიც მემანქანეებს მეტი პასუხისმგებლობის გამოჩენისკენ მოუწოდებს.
ამასთან, კომპანიამ გაასაჯაროვა მემანქანეების ხელფასები:
“თვალსაჩინოებისათვის წარმოგიდგენთ მეტროს მემანქანეების შემოსავლების ზრდის დინამიკას 2013-2017 წლების მიხედვით წლები 2013 -2014- 2015- 2016- 2017 მემანქანე ინსტრუქტორი: 1,824 ლარი, 1,962 ლარი, 1,968 ლარი, 2,046 ლარი, 2,158 ლარი; ხაზის მემანქანე: 1,605 ლარი 1,700 ლარი, 1,730 ლარი, 1,794 ლარი, 1,827 ლარი”, – წერია განცხადებაში.
კომპანია დასძენს, რომ მოლაპარაკებების პროცესში მათ განემარტათ, რომ მემანქანეების ნაწილის მოთხოვნა, ხელფასის 45%-ით გაზრდასთან დაკავშირებით, სხვა თანამშრომლებში “სამართლიან უკმაყოფილებას გამოიწვევს”.
“სატრანსპორტო კომპანია მოუწოდებს მეტროს მემანქანეების კონკრეტულ ჯგუფს უფრო მეტად გაითავისონ ის პასუხისმგებლობა, რაც მათ გააჩნიათ საზოგადოების წინაშე. თავის მხრივ, სატრანსპორტო კომპანია აკეთებს ყველაფერს იმისათვის, რომ მემანქანეების გაფიცვამ არ გამოიწვიოს მეტროს გაჩერება და ქალაქის მუნიციპალური ტრანსპორტის შეფერხება”, – წერია განცხადებაში.
მეტროპოლიტენის მემანქანეების ნაწილი 3 მაისს გაფიცვას გეგმავს. ამასთან დაკავშირებით კახა კალაძემ განაცხადა, რომ უწყება ყველაფერს გააკეთებს, რათა “მეტრო არ გაჩერდეს”.