ჯანდაცვის მინისტრს ორი ახალი მოადგილე ჰყავს

შრომის, ჯანმრთელობისა და სოციალური დაცვის მინისტრს, დავით სერგეენკოს ორი ახალი მოადგილე ჰყავს.
ჯანდაცვის სამინისტროს ინფორმაციით, მინისტრის პირველი მოადგილის თანამდებობას პროფესორი ზაზა ბოხუა დაიკავებს, რომელიც ამ დრომდე თბილისის სახელმწიფო სამედიცინო უნივერსიტეტის დიპლომის შემდგომი სამედიცინო განათლებისა და უწყვეტი პროფესიული განვითარების ინსტიტუტის დირექტორი იყო.
ჯანდაცვის მინისტრის კიდევ ერთი ახალი მოადგილე – მიხეილ დუნდუა იქნება. იგი, ამავდროულად, სოციალური მომსახურების სააგენტოს უხელმძღვანელებს. მიხეილ დუნდუა დღემდე თბილისის სახელმწიფო უნივერსიტეტის ანალიზისა და პროგნოზირების ცენტრის აღმასრულებელი დირექტორი იყო. მან ამ პოზიციაზე ზაზა სოფრომაძე შეცვალა.
შეგახსენებთ, რომ ზაზა სოფრომაძემ თანამდებობა პირადი განცხადების საფუძველზე დატოვა.
ახალი მოადგილეები, ზაზა ბოხუა და მიხეილ დუნდუა უფლებამოსილების შესრულებას დღეიდან დაიწყებენ.