საქართველოს თავდაცვის მინისტრი ოფიციალური ვიზიტით ისრაელში გაემგზავრა.
ლევან იზორიას მასპინძლობას ისრაელის თავდაცვის მინისტრი ავიგდორ ლიბერმანი გაუწევს. შეხვედრაზე საქართველოს თავდაცვის მინისტრი კოლეგას თავდაცვის უწყებაში განხორციელებულ რეფორმებს გააცნობს. ყურადღება საქართველოსა და ისრაელს შორის სხვადასხვა მიმართულებით თანამშრომლობის გაღრმავებაზე გამახვილდება, მათ შორის რეზერვისა და მობილიზაციის სისტემასა და სამხედრო განათლების მიმართულებებზე.
შეხვედრის დასრულების შემდეგ კი, თავდაცვის სფეროში ურთიერთგაგების მემორანდუმის გაფორმება იგეგმება.
ისრაელში ვიზიტის ფარგლებში საქართველოს თავდაცვის სამინისტროს დელეგაცია შეხვედრებს თელავივში, ისრაელის ეროვნული უსაფრთხოების შესწავლის ინსტიტუტსა და ეროვნული უსაფრთხოების საბჭოში გამართავს. იერუსალიმში კი, დელეგაცია ჰოლოკოსტის მსხვერპლთა მუზეუმს მოინახულებს და მემორიალს გვირგვინით შეამკობს.