თბილისის მერი, კახა კალაძე, ჩოგბურთში ქალთა საერთაშორისო ტურნირის ფინალურ შეხვედრას დაესწრო.
თბილისის მერიის ცნობით, ტურნირი 30 აპრილიდან 5 მაისის ჩათვლით, თბილისის მერიის მხარდაჭერით იმართება და მასში 32-მდე ქვეყნის 88 წამყვანი პროფესიონალი ჩოგბურთელი ქალი მონაწილეობს. მათი უმეტესობა მსოფლიოს საუკეთესო ორასეულის მონაწილეა.
თბილისის მერის განცხადებით, დედაქალაქში მსგავსი ტურნირების ჩატარება თბილისის ცნობადობის ამაღლებას შეუწყობს ხელს.
„თბილისის საერთაშორისო ტურნირი იმართება, რაც მისასალმებელია. დაახლოებით, 32 ქვეყნიდან არიან სპორტსმენები ჩამოსული. ასეთი ტურნირები თბილისის განვითარებისა და ცნობადობის გაზრდისთვის მნიშვნელოვანია. ჩვენ ვეხმარებით ჩოგბურთის ფედერაციას და ხელს ვუწყობთ, რომ ბევრი ასეთი ტურნირი ჩატარდეს დედაქალაქში“, – განაცხადა კახა კალაძემ.
მერიის ცნობით, გარდა მონაწილეებისა, ჩემპიონატს ესწრებიან საერთაშორისო მწვრთნელები და თანმხლები პირები (ჯამში 250 ადამიანი). საქართველოდან აღნიშნულ ჩემპიონატში 20-მდე ქართველი ჩოგბურთელი მონაწილეობს. საქართველოში მსგავსი დონის ტურნირი სპორტის ამ სახეობაში პირველად ტარდება.