ფინანსთა სამინისტროს საგამოძიებო სამსახური განმარტებას აკეთებს

საქართველოს ფინანსთა სამინისტროს საგამოძიებო სამსახური ადვოკატთა ასოციაციის წარმომადგენელთა განცხადებებს პასუხობს. 
საქართველოს ფინანსთა სამინისტროს საგამოძიებო სამსახურის   ცნობით, უწყებაში გამოძიება ერთ-ერთი მიკროსაკრედიტო კომპანიის სალაროს შემოსავლის ორდერების გაყალბების ფაქტზე მიმდინარეობს.
მათივე ინფორმაციით, მიკროსაკრედიტო კომპანიასა და ერთ-ერთ მოქალაქეს შორის მიმდინარე სამოქალაქო დავის პროცესში, სასამართლოში წარდგენილია ექვსი ერთეული სალაროს შემოსავლის ორდერი, რომლითაც აღნიშნული მოქალაქე კომპანიაში თანხის შეტანის ფაქტს ადასტურებდა. გამოძიებით დადგენილია, რომ წარდგენილი ექვსი ორდერიდან ორი გაყალბებულია.
როგორც საქართველოს ფინანსთა სამინისტროს საგამოძიებო სამსახური განმარტავს, საქმეზე ობიექტური ჭეშმარიტების დადგენის მიზნით, გამოძიების მიმდინარეობის პროცესში აუცილებელი გახდა საქმეში ფიგურანტი ყველა პირის, მათ შორის ადვოკატების გამოკითხვა. მიმდინარე წლის 28 აპრილს, საგამოძიებო სამსახურში მოწმის სტატუსით გამოკითხვაზე დაბარებული სამი ადვოკატიდან, ერთმა ნებაყოფლობით მიაწოდა გამოძიებას მის ხელთ არსებული ინფორმაცია, ხოლო ორმა უარი განაცხადა გამოკითხვაზე. 
მათივე ინფორმაციით, ამ ეტაპზე, საქმეზე გრძელდება გამოძიება საქართველოს სისხლის სამართლის კოდექსის 362-ე მუხლის მეორე ნაწილის „ბ“ ქვეპუნქტით.
ადვოკატთა ასოციაციის თავმჯდომარე საგამოძიებო სამსახურის გამომძიებლის მხრიდან „ადვოკატებზე ზეწოლის შესახებ“ საუბრობს. როგორც დავით ასათიანმა ადვოკატთა ასოციაციაში გამართულ პრესკონფერენციაზე განაცხადა, ადვოკატების – ლიკა ბითაძისა და ფიქრია მახარაძის წინააღმდეგ ფინანსური პოლიციის გამომძიებელი ჟიული ტაბაღუა მათ კლიენტს იყენებს. 
თავის მხრივ, ადვოკატმა ფიქრია მახარაძემ აღნიშნა, რომ კლიენტმა, რომელსაც ის იცავს, გამოძიებას ყალბი დოკუმენტები წარუდგინა, ამის გამო სისხლის სამართლის პასუხისმგებლობა რომ თავიდან აეცილებინა, დოკუმენტების გაყალბება ადვოკატებს დააბრალა.
საქმე ეხება მიკროსაფინანსო ორგანიზაცია “კავკასუს კრედიტსა” და მოქალაქე მამუკა თათარაშვილს შორის მიმდინარე დავას, რაზეც გამოძიება მიმდინარეობს. გამოძიების ფარგლებში თათარაშვილის მიერ წარდგენილ გადახდის ქვითრებზე ექსპერტიზას სიყალბე აქვს დადგენილი, რის გამოც, ფინანსთა სამინისტროს საგმოძიებო სამსახურმა ადვოკატები ლიკა ბითაძე და ფიქრია მახარაძე მოწმის სახით დაიბარა და ჩვენების მიცემას ითხოვს. ადვოკატების განცხადებით, ისინი ჩვენების მიცემას არ აპირებენ.