აგვისტოს ომის საქმეზე ჩვენთვის უმთავრესია, სამართლებრივად დავადასტუროთ, რომ ცხინვალის რეგიონში 8 აგვისტოდან დღემდე რუსეთი ახორციელებდა და ახორციელებს კიდევ უფრო მაღალი ხარისხის ეფექტურ კონტროლს, ვიდრე 8 აგვისტომდე, რომ ოკუპაცია მიმდინარეა კვლავაც,- ამის შესახებ იუსტიციის მინისტრმა, თეა წულუკიანმა პირველი არხის გადაცემაში, „42° პარალელი“.
„ჩვენთვის აგვისტოს ომის საქმეზე უმთავრესია, რომ სამართლებრივად დავადასტუროთ და ეს ევროპულმა სასამართლომ გაიზიაროს, რომ ცხინვალის რეგიონში 8 აგვისტოდან დღემდე რუსეთი ახორციელებდა და ახორციელებს კიდევ უფრო მაღალი ხარისხის ეფექტურ კონტროლს, ვიდრე 8 აგვისტომდე; ოკუპაცია მიმდინარეა კვლავაც; რუსეთის არგუმენტი, თითქოს არაფერ შუაშია და თუ იქ რამე მოხდა, ეს საქართველოს სახელმწიფოს ბრალია, ანდა იქ მყოფი დე ფაქტო ორგანოების ბრალი შეიძლება იყოს და მან რა იცის, იქ რა ხდებოდა; ჩვენ ეს მითი სამართლებრივად, ერთობლივი მტკიცებულებების საფუძველზე უნდა დავამარცხოთ. 23 მაისს ჩვენ საქმე გვაქვს სამართლებრივ დავასთან, რაც გაცილებით უფრო მაღალი ხარისხის სერიოზულობას მოითხოვს, რადგან იქ ნებისმიერი რამ შეიძლება მეორე მხარემ გამოიყენოს“,– განაცხადა თეა წულუკიანმა.
იუსტიციის მინისტრის თქმით, დიდი ხნის განმავლობაში (2008 წელს რომ შევიდა საჩივარი სტრასბურგში, 2012 წელს ხელისუფლება შეიცვალა), 2017 წლამდე რუსეთი საქართველოს საყვედურობდა, რომ გორში 12 აგვისტოს ჩამოვარდნილი „ისკანდერი“ ქართველების გამოგონილი ამბავია, რომ ეს საერთოდ ასე არ მომხდარა და ფოტომასალა, რაც არა მხოლოდ საქართველოში, არამედ ჰოლანდიაშიც, ჰოლანდიელი ჟურნალისტის მკვლელობის საქმიდან გამომდინარე არსებობს, არის ფოტოშოპი.
„ჩვენი ძალიან სიღრმისეული მუშაობის შედეგად 2017 წელს მივაკვლიეთ გორში ჩამოვარდნილი „ისკანდერის“ ერთ ნაწილს, ნამსხვრევებს და უკვე რამდენიმე კვირის წინ, აპრილის ბოლოს, მოვიპოვეთ დაახლოებით 800 კგ იმავე „ისკანდერის“ დანარჩენი ნაწილები. მათზე, რა თქმა უნდა, შენარჩუნებულია ყველა კვალი იმისა, რომ ნამდვილად ეს იარაღია, ნამდვილად ნაწარმოებია მოპასუხე სახელმწიფოს − რუსეთის ფედერაციის მიერ და რეალურად ვერანაირ ფოტოშოპზე საუბარი ამ სამართლებრივ დავაში ვერ იქნებოდა.
ჩვენ დღეს ხელთ გვაქვს ჰოლანდიური გამოძიების, ჩვენივე გამოძიების შედეგები, საექსპერტო დასკვნები და მატერიალური მტკიცებულება, ნივთმტკიცება, ძალიან დიდი ძალისხმევის შედეგად მიგნებული და მოპოვებული. ჩვენ მივმართეთ ჰააგის სასამართლოს ექსპერტიზისთვის მაშინვე, როგორც კი „ისკანდერის“ პირველი ნაწილები მოვიპოვეთ. ეს ექსპერტიზა ჩატარდა. ჰააგის სასამართლოდან ჩვენ მტკიცებულებაც გვაქვს წარდგენილი 23 მაისის სხდომისთვის, რომ რეალურად სისხლის საერთაშორისო სასამართლოს ექსპერტებმა ამ „ისკანდერს“ და არა რომელიმე სხვა იარაღს, ჩაუტარეს ექსპერტიზა. ეს ძალიან მნიშვნელოვანია. გვაქვს ბევრი სხვა მტკიცებულება, რადარების მონაცემები, სადაც ცალსახად ჩანს, რომ ქართულ სივრცეში ამ პერიოდში მხოლოდ რუსული თვითმფრინავები დაფრინავდნენ და იქ ქართული შენაერთები საერთოდ არ იყვნენ. ჩვენი საჰაერო სივრცე მთლიანად, ყოველდღიურად და არა რომელიმე ერთ დღეს, იყო მოცული რუსული სამხედრო თვითმფრინავებით.
ბრმა უნდა იყო ან არ გინდოდეს, რომ ეს დაინახო. ჩვენ, ასევე, გვაქვს სეისმოლოგების დასკვნები; გვაქვს საგარეო საქმეთა სამინისტროს ოფიციალური ნოტა, რომელიც გაეგზავნა რუსეთის ფედერაციას და მტკიცებულებაც გვაქვს, რომ ჩაბარდა; რომ საქართველომ 10 აგვისტოს, გამთენიისას ცეცხლი შეწყვიტა“,- განაცხადა თეა წულუკიანმა გადაცემაში „42° პარალელი“.
სახელმწიფოთაშორის დავას სტრასბურგის სასამართლოს დიდი პალატა განიხილავს, რომელიც 17 ქვეყნის, მათ შორის, საქართველოდან და რუსეთიდან არჩეული მოსამართლეებითაა დაკომპლექტებული. დიდ პალატას ადამიანის უფლებათა ევროპული სასამართლოს პრეზიდენტი გვიდო რაიმონდი ხელმძღვანელობს.
სტრასბურგის სასამართლო აგრძელებს საქმის განხილვას „საქართველო რუსეთის წინააღმდეგ (საქმე II)“. ზეპირი მოსმენა 23 მაისსაა ჩანიშნული.