ერევანში სომხეთის ყოფილი პრეზიდენტის და პრემიერმინისტრის, სერჟ სარგსიანის ღვიძლი ძმა ალექსანდრე სარგსიანი (საშიკი) დააკავეს. ინფორმაციას Sputnik Armenia პოლიციაზე დაყრდნობით ავრცელებს.
პოლიციის ცნობით, სარგსიანი განყოფილებაში იარაღის უკანონო შენახვის გამო მიიყვანეს.
მანამდე ჩხრეკა ჩატარდა ორ კომპანიაში, რომლებსაც ალექსანდრე სარგსიანთან აკავშირებენ. ეჭვობენ, რომ ამ კომპანიების ხელმძღვანელებმა დიდი ოდენობით ფული გაიტაცეს.
სერჟ სარგსიანი 2008 წლიდან 2018 წლამდე ქვეყნის პრეზიდენტი იყო. ამ წლის გაზაფხულზე, მეორე საპრეზიდენტო ვადის ამოწურვის შემდეგ, ის პრემიერმინისტრად აირჩიეს, თუმცა მასობრივი პროტესტების გამო, ის რამდენიმე დღეში თანამდებობიდან გადადგა.
ახლა ქვეყნის პრემიერმინისტრი ამ საპროტესტო მოძრობის ლიდერი ნიკოლ ფაშინიანია.
იმედინიუსი
კომენტარები