ყველაფერი კიდევ ერთხელ ასაბუთებს იმას, საქართველო აშშ-სთვის რაოდენ სანდო პარტნიორია, – ამის შესახებ საგარეო საქმეთა მინისტრის პირველმა მოადგილემ, დავით ზალკალიანმა გადაცემა 2030-ში განაცხადა.
“თავად ის ფაქტი, რომ ჯონ კერის საქართველოში ვიზიტი ნატო-ს სამიტის წინ შედგა, ჩვენი ქვეყნის ევროატლანტიკური კურსის მხარდაჭერის ძალიან სერიოზული გზავნილია. მნიშვნელოვანია პრეზიდენტ ობამას გზავნილები, რაც სახელმწიფო მდივანმა საქართველოში ჩამოიტანა. მან განცხადება პრეზიდენტ ობამას სახელით გააკეთა და თქვა, რომ აშშ-ის პრეზიდენტი მხარს უჭერს საქართველოს სუვერენიტეტს, ტერიტორიულ მთლიანობას, უსაფრთხოებას, დემოკრატიულ განვითარებასა და კეთილდღეობას”, – განაცხადა ზალკალიანმა.
მისი თქმით, ამერიკა საქართველოსთან ორმხრივ ურთიერთობებში ფართო სპექტრს განიხილავს. საქართველო-ამერიკის სტრატეგიული პარტნიორობა თვისობრივად ახალ ეტაპზე გადადის.
“საქართველო-ამერიკის სტრატეგიული პარტნიორობა თვისობრივად ახალ ეტაპზე გადადის. უაღრესად მნიშვნელოვანი გზავნილია ის, რომ აშშ აცხადებს მზაობას, საქართველოს თავდაცვისუნარიანობის განმტკიცებაში ხელი შეუწყოს. ჩვენ ძალიან სერიოზული ხელშესახები შედეგები გვაქვს. დღეს ხელი მოეწერა ძალიან სერიოზულ დოკუმენტებს. ამერიკა-საქართველოს შორის გაფორმებული ურთიერთგაგების მემორანდუმი უპრეცედენტოა, რადგან აშშ-თან მსგავსი ტიპის ორმხრივი შეთანხმება ჩვენ არ გვქონია”, – განაცხადა საგარეო საქმეთა მინისტრის პირველმა მოადგილემ.
როგორც მან აღნიშნა, ეს ყველაფერი კიდევ ერთხელ ასაბუთებს იმას, საქართველო აშშ-სთვის რამდენად სანდო პარტნიორია.
“გზავნილები, რაც საქართველოს პრემიერმინისტრისა და აშშ-ის სახელმწიფო მდივნის მხრიდან გაჟღერდა, იმაზე მიუთითებს, რომ ძალიან წარმატებული ვარშავის სამიტი იქნება. მნიშვნელოვანია ის ფრაზა, რომელიც სახელმწიფო მდივანმა თქვა, რომ საქართველო რეგიონში დემოკრატიის მოდელია და ის წარმატებები, რაც საარჩევნო რეფორმის განხორციელების მიმართულებით აქვს, რეგიონში მისაბაძია. ეს ყველაფერი კიდევ ერთხელ ასაბუთებს იმას, საქართველო აშშ-სთვის რაოდენ სანდო პარტნიორია”, – განაცხადა დავით ზალკალიანმა.