ვენესუელის მედიის თანამშრომელთა ეროვნული კავშირის ინფორმაციით, ქვეყნის პრეზიდენტზე ნიკოლას მადუროზე თავდასხმასთან დაკავშირებით 11 ჟურნალისტი დააკავეს. დაკავებულთა შორისაა, როგორც ვენესუელის, ასევე არგენტინისა და ესპანეთის მედიასაშუალებების ჟურნალისტები. თავდასხმის ბრალდებით კიდევ 6 ადამიანია დაკავებული.
აფეთქება კარაკასში ვენესუელის პრეზიდენტის ნიკოლას მადუროს სიტყვით გამოსვლის დროს მოხდა. მადურო ნაციონალური გვარდიის შექმნის წლისთავთან დაკავშირებით ღონისძიებაზე სიტყვით გამოდიოდა.
აფეთქებისთვის მფრინავი დრონი გამოიყენეს, რომელზეც ასაფეთქებელი მოწყობილობა იყო დამონტაჟებული. აფეთქებისას 6 სამხედრო მოსამსახურე დაიჭრა, თავად პრეზიდენტი არ დაშავებულა.
მადურო თავდასხმაში კოლუმბიის ხელისუფლებას ადანაშაულებს. სატელევიზიო მიმართვაში ვენესუელის ლიდერმა მეზობელი სახელმწიფო და პირადად მისი პრეზიდენტი ხუან მანუელ სანტოსი დაადანაშაულა, თუმცა ამის დამადასტურებელი არანაირი მტკიცებულება არ წარუდგენია.
ნიკოლას მადურო ვენესუელის პრეზიდენტად მეორე ვადით აირჩიეს. არჩევნების შედეგების გამოცხადების შემდეგ აშშ-მა ვენესუელას სანქციები დაუწესა
მადურო, რომელიც უგო ჩავესის მმართველობის დროს ვიცეპრეზიდენტის პოსტს იკავებდა, მთავრობის სათავეში 2013 წლის მარტში, ჩავესის გარდაცვალების შემდეგ მოვიდა.
იმავე წლის აპრილში კი უკვე არჩევნებში გამარჯვებით მან ვენესუელის პრეზიდენტის პოსტი ოფიციალურად დაიკავა.