თბილისის საქალაქო სასამართლო მალხაზ ტოხოსაშვილისთვის აღკვეთის ღონისძიების შეფარდების საკითხზე მსჯელობს. სახელმწიფო უსაფრთხოების სამსახურის კონტრტერორისტულმა ცენტრმა ტოხოსაშვილი იმ გამოძების ფარგლებში დააკავა, რომელსაც ტერორისტულ ორგანიზაციაში გაერთიანებისა და ტერორისტულ საქმიანობაში დახმარების ფაქტზე აწარმოებს.
დაკავებულს ბრალი საბრძოლო მასალის უკანონოდ შეძენა-შენახვის ფაქტზე წაუყენეს. ამასთან, მისი საცხოვრებელი სახლისა და სამსახურის ჩხრეკისას „ისლამური სახელმწიფოს“ სიმბოლიკიანი დროშები და ელექტრონული ინფორმაციის მატარებელი მოწყობილობები ამოიღეს. ჩხრეკის შედეგად ამოღებულია საბრძოლო ვაზნებიც.
ბრალდების მხარე მისთვის აღკვეთის ღონისძიების სახით პატიმრობის გამოყენებას ითხოვს და აცხადებს, რომ არსებობს როგორც მიმალვის, ასევე მტკიცებულებების განადგურების საფრთხე.
„ბრალდებულს დღეის მდგომარეობით წარდგენილი აქვს ბრალდება, რომელიც გათვალისწინებულია სსკ-ის 236-ე მუხლის მე-3 ნაწილით. ეს გახლავთ საბრძოლო მასალის მართლსაწინააღმდეგოდ შეძენა-შენახვა. გარდა ამისა, აღნიშნულ სისხლის სამართლის საქმეზე გამოძიება სხვა მიმართულებით მიმდინარეობს, ტერორისტულ ორგანიზაციაში გაერთიანებისა და მისი დახმარების ფაქტზე. შესაბამისად, მომავალში იმის მიხედვით, თუ რას დაადგენს გამოძიება, არ არის გამორიცხული, რომ მას ბრალი დაუმძიმდეს. თუმცა, ამ ეტაპზე, წარდგენილი აქვს საბრძოლო მასალის მართლსაწინააღმდეგო შეძენა-შენახვა“, – აცხადებს პროკურორი, ნანა ხუნჯუა.