შინაგან საქმეთა სამინისტრომ 2002 წელს დაბადებული ლ.ჯ. ტექნიკის მაღაზია „სმაილის“ გაქურდვის მცდელობის ფაქტზე დააკავეს.
ქურდობისთვის პირობითი მსჯავრის ქვეშ მყოფმა ლ.ჯ.-მ ხიზანიშვილის ქუჩაზე მდებარე ტექნიკის მაღაზიის ვიტრინა ჩაამტვრია, სავაჭრო ობიექტში უკანონოდ შეაღწია და იქ გამოფენილი მობილური ტელეფონების მოპარვა სცადა, რა დროსაც პოლიციამ შემთხვევის ადგილზე დააკავა.
გამოძიება ქურდობის მცდელობის ფაქტზე, საქართველოს სისხლის სამართლის კოდექსის 19-177-ე მუხლის მე-2 ნაწილის “ბ” ქვეპუნქტით მიმდინარეობს.
არასრულწლოვნების მიერ ბოლო პერიოდში ქურდობის გახშირებულ შემთხვევებთან დაკავშირებით, შს მინისტრმა გიორგი გახარიამ 3 აგვისტოს განაცხადა, რომ მისი უწყება პარლამენტს თხოვნით მიმართავს, რათა მართლმსაჯულების კოდექსში გარკვეული ცვლილებები განხორციელდეს.
სისხლის სამართლის პასუხისგების 14 წელს ქვემოთ მოზარდებზე გავრცელებას იუსტიციის მინისტრი არ ეთანხმება. თეა წულუკიანის თქმით, კოდექსში შესაძლებელია მხოლოდ ტექნიკური საკითხები შესწორდეს, მაგრამ მთავარი მიდგომა ბავშვთა უფლებების ხარჯზე არ უნდა შეიცვალოს.
იმედინიუსი