ბათუმში, აეროპორტის გზატკეცილზე 4 წლის გოგონას მკვლელობაში ბრალდებული უზბეკეთის მოქალაქე სარა მირბობოიევა მოსამართლე ლევან გელოვანმა პატიმრობაში დატოვა. სარა მირბობოიევა ამ დრომდე დუმილის უფლებას იყენებს.
მან პროცესში ნაფიც მსაჯულთა მონაწილეობაზე უარი განაცხადა.
პროცესს მოკლული 4 წლის გოგონას ძიძაც ესწრებოდა, რომელიც საქმესთან დაკავშირებით კიდევ ერთი ქალბატონის დასჯას ითხოვს. მისი თქმით, 4 წლის ბავშვს უზბეკეთის ორი მოქალაქე სასტიკად გაუსწორდა და მოკლა. როგორც ძიძა თამარ ახალაძე ამბობს, ბავშვის ცხედარი თავად დაკრძალეს, რომელსაც მრავლობითი დაზიანება აღენიშნებოდა.
„ცხედარი იყო საშინელ მდგომარეობაში, სულ დაშავებული. ვინც ჩააცვა ჩვენ სიახლოვესაც ვერ მივედით. მაგას არც ერთი ადამიანი არ იზამს. ალბათ, მხეციც კი არა. ნაწამები, მხარი მოტეხილი, ტუჩი გახეთქილი და მთელი ტანი დაშავებული,“ – აღნიშნა ოჯახის ახლობელმა, თამარ ახალაძემ.
4 წლის გოგონა დედამ მეგობარს დაუტოვა. დედის მეგობარმა, გოგონა სავარაუდოდ, ცემის შედეგად მოკლა, გარდაცვლილი ბავშვის ცხედარი პოლიციის განყოფილებაში მიიტანა და სამართალდამცველებს ჩაბარდა. მას ბრალის დადასტურების შემთხვევაში 20 წლამდე თავისუფლების აღკვეთა ან უვადო პატიმრობა ემუქრება.