ათენში ჩატარებული სპეცოპერაციისას სამართალდამცავებმა 40 წლის ნინო ინაიშვილი იმ დროს აიყვანეს, როდესაც ის 4 დღის ჩვილ გოგონას ყიდიდა. ბავშვებით ვაჭრობის სქემა პოლიციის ოფიცრებმა გაშიფრეს, რომლებმაც ნინო ინაიშვილს თავი ბავშვის ყიდვის მსურველებად გააცნეს.
ბერძენი სამართალდამცველების მტკიცებით, ქართველ ქალს მყიდველებსა და გამყიდველებს შორის შუამავლის ფუნქცია ჰქონდა.
ნინო ინაიშვილის დედა ადასტურებს, რომ მისი შვილი წლებია, საბერძნეთში ხელოვნური განაყოფიერების ცენტრში მუშაობს და მთავარი მოვალეობა სწორედ სამედიცინო დაწესებულებაში მისულ კლიენტებთან ურთიერთობაა.
გავრცელებული ინფორმაციით, ქალბატონი საქართველოში ბოლო 12 წლის განმავლობაში არ ყოფილა.
ბერძნული მედიის ინფორმაციით, საქართველოს მოქალაქესთან ერთად, სპეცოპერაციის დროს დააკავეს დანაშაულებრივი ჯგუფის კიდევ 8 წვერი. ისინი ბულგარეთის მოქალაქეები არიან.
დაკავებულებს შორის ერთ-ერთი ფეხმძიმე ქალია. ბერძენი სამართალდამცველების მტკიცებით, ის ჩვილის გაყიდვას მშობიარობისთანავე გეგმავდა. ბინების ჩხრეკის შედეგად ამოღებულია 9 ათას ევროზე მეტი.