სომხეთში ხავერდოვანი რევოლუციის შემდეგ ნიკოლ ფაშინიანი დარწმუნებულია, რომ სომხეთ-საქართველოს ურთიერთობები ახალ ეტაპზე გადავა. სომხეთის პრემიერმა დაანონსა, რომ უახლოეს პერიოდში ის ერევანში მამუკა ბახტაძეს ელოდება. შეხვედრაზე საუბარი იქნება ის სტრატეგიული კავშირები, რომელიც ამ დროისთვის ქვეყანსა და რეგიონში არსებობს.
ნიკოლ პაშინიანმა ასევე სამცხე-ჯავახეთში მის ვიზიტთან დაკავშირებით ისაუბრა. სომხეთის პრემიერის თქმით, შეხვედრაზე მისი მთავარი გზავნილი იყო, რომ სომხები და ქართველები მეგობრები არიან.
„საქართველოში სამცხე-ჯავახეთში მე ძალიან თბილი ვიზიტი მქონდა, რაც სიმბოლურია და ჩვენი ქვეყნების სიახლოვეს უსვამს ხაზს. არა მარტო ახლა, ოპოზიციაში ყოფნის დროსაც ვამბობდი, რომ საქართველოსთან განსაკუთრებული ურთიერთობა უნდა გვქონდეს და ეს ურთიერთობა გეოპოლიტიკური გავლენებისგან უნდა დავიცვათ. სამცხე-ჯავახეთში ბევრი სომეხი ცხოვრობს, იქ ჩემი მთავარი მესიჯი იყო, რომ სომხეთი და საქართველო არიან მეგობრული მეზობლები, ჩვენ ვართ მოძმე ერები.
ქართველი ხალხი უნდა იყოს დარწმუნებული, რომ სომხეთის ქმედებებში საქართველოს მიმართ არანაირი შეთქმულება ან ნეგატიური ზრახვა არ არსებობს. სომეხი ხალხი კი უნდა იყოს დარწმუნებული, რომ საქართველოს მთავრობისა და ქართველი ხალხის ქმედებებში სომხეთის წინააღმდეგ არანირი შეთქმულება და უარყოფითი ასპექტი არ არის. ვფიქრობ, ჩვენი მთავრობის კონკრეტული ამოცანა ამ ფორმულის განხორციელების უზრუნველყოფა არის და ვფიქრობ, ეს ფორმულა იქნება ჩვენი საუკეთესო ურთიერთობების გარანტია. ამგვარად, ჩვენ შევძლებთ ჩვენი ურთიერთობების კიდევ უფრო გაძლიერებას“, – განაცხადა ნიკოლ ფაშინიანმა.