აშშ-ს პრეზიდენტმა დონალდ ტრამპმა სირიის რეჟიმის ლიდერი ბაშარ ასადი გააფრთხილა, იდლიბის პროვინციაზე „უგუნური თავდასხმა“ არ გაბედოს.
„სირიის პრეზიდენტმა ბაშარ ასადმა იდლიბის პროვინციაზე უგუნური თავდასხმა არ უნდა გაბედოს. რუსები და ირანელები დიდ ჰუმანიტარულ შეცდომას დაუშვებენ თუ მონაწილეობას მიიღებენ ამ პოტენციურ ადამიანურ ტრაგედიაში. ასი ათასობით ადამიანი შეიძლება დაიღუპოს. არ დაუშვათ ეს“, – დაწერა აშშ-ს პრეზიდენტმა „ტვიტერის“ საკუთარ გვერდზე.
აღსანიშნავია, რომ 30 აგვისტოს სირიის საგარეო საქმეთა მინისტრმა ვალიდ მუალემმა რუსეთის საგარეო საქმეთა მინისტრთან სერგეი ლავროვთან შეხვედრის შემდეგ განაცხადა, რომ სირია იდლიბის გათავისუფლების გზაზე ბოლომდე წავა მიუხედავად იმისა დაარტყამს თუ არა ვაშინგტონი სირიას ქიმიური იარაღის გამოყენების საბაბით.
თავის მხრივ, რუსეთის თავდაცვის სამინისტრომ 25 აგვისტოს განცხადება გააკეთა, რომ იდლიბის პროვინციაში სირიის სამთავრობო ძალების მიერ ქიმიური იარაღის გამოყენების ინსცენირება მზადდება, რომელშიც აქტიურად არიან ჩართულნი ამერიკული და ბრიტანული სპეცსამსახურები, რის შედეგადაც, აშშ, საფრანგეთი და დიდი ბრიტანეთი სირიაში სამთავრობო ძალების პოზიციებს დაარტყამს.