საქართველოს 2 მოქალაქე უკვე მეოთხე დღეა, კვიპროსელ მესაზღვრეებს ჰყავთ დაკავებული
„მაესტროს“ ცნობით, ვიზალიბერალიზაციის პროცედურების დარღვევის გამო, საქართველოს 2 მოქალაქე კვიპროსის რესპუბლიკის სასაზღვრო სამსახურის თანამშრომლებმა ქვეყანაში არ შეუშვეს. ისინი ქუთაისიდან ლარნაკას მიმართულებით 4 სექტემბერს გაფრინდნენ და უკვე მეოთხე დღეა, სასაზღვრო სამსახურის მოსაცდელ სივრცეში იმყოფებიან.
კვიპროსის რესპუბლიკაში საკონსულო ფუნქციების შემსრულებლის თინათინ ნონიაშვილის თქმით, საქართველოს მოქალაქეები სამშობლოში ხვალ გამოფრინდებიან.
„მოქალაქეებს მიეწოდათ დეტალური ინფორმაცია მათი უფლებების შესახებ, ემცნოთ საქართველოში უკან დაბრუნების თარიღი – 8 სექტემბერი, როდესაც მათ მგზავრობას უზრუნველყოფს კვიპროსის მხარე. საქართველოს მოქალაქეებს ასევე განემარტათ, რომ მათი სურვილის შემთხვევაში, აქვთ შესაძლებლობა, თავად აირჩიონ უკან დაბრუნების თარიღი, მხოლოდ ამ შემთხვევაში პასუხისმგებლები ხდებიან მგზავრობის ხარჯებზე. საქართველოს მოქალაქეები ასევე ინფორმირებულნი არიან საქართველოში დაბრუნების შემდეგ კვიპროსში არშეშვებასთან დაკავშირებით შესაძლო ლეგალური რეაგირების გზებზე. მათი ჯანმრთელობის მდგომარეობა დამაკმაყოფილებელია, ერთ-ერთ მათგანს მიეწოდა ქრონიკული მოხმარების მედიკამენტი. არსებული წესების თანახმად, ისინი დღეში ერთჯერადად იკვებებიან, ხოლო საკუთარი ხარჯით შეუძლიათ დამატებით მოითხოვონ კვება”, – განაცხადა თინათინ ნონიაშვილმა.