საბერძნეთში პოლიციასა და დემონსტრანტებს შორის შეტაკება მოხდა. სალონიკში პოლიციამ აქცია ცრემლმდენი გაზის გამოყენებით დაშალა. ამის შესახებ BBC წერს.
აქციის მონაწილეები მაკედონიისთვის სახელწოდების შეცვლას აპროტესტებდნენ. დემონსტრაცია იმ დროს გაიმართა, როდესაც სალონიკში ქვეყნის პრემიერმინისტრი ალექსის ციპრასი იმყოფებოდა.
მაკედონიას სახელი შეეცვალა და ჩრდილოეთ მაკედონიის რესპუბლიკა ეწოდა. ორი ქვეყნის საზღვართან, შეთანხმებას ხელი საბერძნეთის პრემიერმინისტრმა, ალექსის ციპრასმა, მაკედონიის პრემიერმინისტრმა, ზორან ზაევმა და გაეროს გენერალური მდივნის წარმომადგენელმა 17 ივნისს მოაწერეს.
მაკედონიის სახელწოდების შესახებ კამათი 1991 წელს იუგოსლავიიდან დამოუკიდებლობის მოპოვების შემდეგ დაიწყო. ახლა, როდესაც მაკედონია ნატოსა და ევროკავშირში გაწევრიანებას გეგმავს, მისი სახელწოდება კიდევ უფრო აქტუალური გახდა. საბერძნეთის ხელისუფლება შიშობს, რომ ამ სახელწოდებამ შესაძლოა ჩრდილოეთ საბერძნეთის პროვინცია მაკედონიასთან დაკავშირებით სირთულეები შექმნას.