გიგლა აგულაშვილი არის კარგი მინისტრი და ჩემთვის სასიამოვნოა მასთან ერთად ერთ გუნდში მუშაობა, – ამის შესახებ საქართველოს პრემიერ-მინისტრმა გიორგი კვირიკაშვილმა ჟურნალისტებს განუცხადა.
„ჩვენ გვქონდა საუბარი. გარემოს დაცვის სამინისტროს მიმართულებით გვაქვს ძალიან საინტერესო გეგმები. მოხარული ვარ, რომ გიგლამ მიიღო გადაწყვეტილება. გიგლა აგულაშვილი არის ძალიან კარგი მინისტრი და ჩემთვის სასიამოვნოა მასთან ერთად ერთ გუნდში მუშაობა. გადაწყვეტილება მიღებულია, რომ ჩვენი პარტია არჩევნებზე დამოუკიდებლად გავიდეს. იყო გარკვეული კონსულტაციები და ჩვენ ცივილიზებულად მივიღეთ ეს გადაწყვეტილება“, – განაცხადა პრემიერ-მინისტრმა.
რაც შეეხება თავდაცვის მინისტრის თინა ხიდაშელისა და სახელმწიფო მინისტრ პაატა ზაქარეიშვილის მხრიდან თანამდებობის დატოვებას, პრემიერ-მინისტრი აცხადებს, რომ თავდაცვის მინისტრს ჩასატარებელი აქვს ვიზიტი აშშ-ში.
„დღეს არ ვღებულობთ მათი გადადგომის გადაწყვეტილებას. ველოდებით, ვიზიტის დასრულებას. რაც შეეხება პაატა ზაქარეიშვილს და მისი საბოლოო გადაწყვეტილებას, იგი ამ დღეებში აპირებს გადადგომას. ეს ყველაფერი დასრულდება ცივილიზებულად”, – განაცხადა პრემიერ-მინისტრმა.