აჰვაზში მომხდარ ტერაქტზე პასუხისმგებლობას ირანი „ტერორიზმის რეგიონალურ სპონსორებსა და მათ ამერიკელ ინსტრუქტორებს“ აკისრებს, – ამის შესახებ ქვეყნის საგარეო საქმეთა მინისტრმა მოჰამად ჯავად ზარიფმა განაცხადა.
„ტერორისტებმა, რომლებიც უცხოურმა რეჟიმებმა დაიქირავეს, გაწვრთნეს, შეიარაღება გადასცეს და დააფინანსეს, აჰვაზე იერიში მიიტანეს. მსხვერპლთა შორის ბავშვები და ახალგაზრდები არიან. მსგავს თავდასხმებზე პასუხისმგებლობას ირანი ტერორიზმის რეგიონალურ სპონსორებსა და მათ ამერიკელ ინსტრუქტორებს აკისრებს“, – წერს ზარიფი „ტვიტერის“ საკუთარ გვერდზე.
მისივე თქმით, ირანი საკუთარი მოსახლეობის დასაცავად „სწრაფ და მტკიცე“ ზომებს მიიღებს.
შეგახსენებთ, რომ ქალაქ აჰვაზში, სამხედრო აღლუმის დროს უცნობმა პირებმა ცეცხლი გახსნეს. ტერაქტის შედეგად დაიღუპა 11 და დაშავდა 20-ზე მეტი ადამიანი.