ვანო მერაბიშვილის ვადაზე ადრე გათავისუფლების საკითხთან დაკავშირებით პოლიტიკური ფაქტორი გამორიცხულია, წინასწარ კი წარმოდგენა არ მაქვს, რა შეიძლება, საბჭომ იფიქროს, – ამის შესახებ საქართველოს იუსტიციის მინისტრმა, თეა წულუკიანმა პირველი არხის გადაცემაში „მოამბე – დღის თემა“ სტუმრობისას განაცხადა. თეა წულუკიანმა ვანო მერაბიშვილის ოჯახს მიმართა და განაცხადა, რომ მათ პატიმარს ჯანმრთელობის სერიოზული პრობლემები არ აქვს.
„ჰორნერის სინდრომს, რომელიც ვანო მერაბიშვილს დაუდგინდა, როგორც კომპეტენტურმა მედიკოსებმა თქვეს, ხან სიმსივნე იწვევს, ხან ინფარქტი, ხან ინსულტი და ხან ინტოქსიკაცია, ან ფარისებრი ჯირკვლის პრობლემები. სამოქალაქო კლინიკებში გადაყვანის შედეგად ვნახეთ, რომ სიმსივნე მის არცერთ ორგანოზე არ ფიქსირდება; ასევე გამოირიცხა ფარისებრი ჯირკვლის პრობლემები; საბედნიეროდ, სახეზე არ არის ინსულტი და ინფარქტი და რჩება ის, რასაც ამბობენ, რომ შეიძლება, არის ინტოქსიკაცია. ექიმები კი გვეუბნებიან, რომ ინტოქსიკაცია გამორიცხულია და არ გვაძლევენ რეკომენდაციას, რომ ტესტები გავაკეთოთ“,– განაცხადა წულუკიანმა.
მისი თქმით, აგვისტოს პირველ დღეებში, როდესაც ვანო მერაბიშვილმა სამედიცინო პერსონალთან დააფიქსირა, რომ ჯანმრთელობის პრობლემები ჰქონდა, მას ყველა ტიპის კონსულტაცია დროულად ჩაუტარდა.
„ის სამედიცინო კლინიკაში რამდენჯერმე იყო გაყვანილი. საზოგადოებისგან კითხვა ისმოდა, ალბათ, მართლაც რაღაც სჭირს და მძიმედ არის, თორემ ამდენჯერ რატომ გაჰყავთო. პატიმრების სამოქალაქო კლინიკაში გაყვანის ფაქტები ძალიან ბევრია, წელიწადში – ასეულობით და იქ გაყვანა იმას არ ნიშნავს, რომ პატიმარი მძიმედაა. ჩვენ პატიმრის დამძიმებას არ ველოდებით იმისთვის, რომ სამოქალაქო კლინიკაში გადავიყვანოთ.
საკმარისია, ვანო მერაბიშვილმა, თუ ნებისმიერმა სხვა პატიმარმა რაიმე აიტკიოს, თუ პენიტენციური სამსახური ჩათვლის, რომ უკეთესი სამოქალაქო კლინიკა იქნება და არა ციხის საავადმყოფო, გადაყვანა კითხვის ნიშნის გარეშე ხდება. ამის „ნაციონალური მოძრაობისთვის“ ახსნა მგლის თავზე სახარების კითხვაა, რადგან მათ სამოქალაქო კლინიკაში მხოლოდ მომაკვდავი პატიმრები გადაჰყავდათ, რასაც თავის დროზე, სიკვდილის ექსპორტი დაერქვა“, – განაცხადა წულუკიანმა.