თურქეთის პრეზიდენტმა რეჯეფ თაიფ ერდოღანმა გაუჩინარებული არაბი ჟურნალისტის ჯამალ ჰაშაღის საქმე, რომელიც ამერიკული გამოცემა The Washington Post-ის მიმომხილველად მუშაობდა, პირად კონტროლზე აიყვანა. ამის შესახებ Hurriyet daily news-ი წერს.
„რაც არ უნდა გაირკვეს, ჩვენ პირველები ვიქნებით, ვინც ამას მსოფლიოს მოვუყვებით“,- განაცხადა თურქეთის პრეზიდენტმა. მან ასევე მწუხარება გამოთქვა, რომ ეს ინციდენტი თურქეთში მოხდა. თურქეთის პრეზიდენტის თქმით, გამომძიებლები ამჟამად სათვალთვალო კამერების ჩანაწერებს სწავლობენ.
მიმდინარე წლის 2 ოქტომბერს ის სტამბოლში საუდის არაბეთის გენერალურ საკონსულოში მივიდა, მას შემდეგ რაც საკონსულოს თანამშრომლები მას ტელეფონით დაუკავშირდნენ და გარკვეული დოკუმენტების ხელმოწერის მიზნით საკონსულოში მისვლა სთხოვეს. ამის შემდეგ მისი კვალი იკარგება. ვარაუდობენ, რომ ჟურნალისტი საუდის არაბეთის საკონსულოში მოკლეს.
წარმოშობით საუდელი ჟურნალისტი ერ-რიადის მიმართ კრიტიკული განცხადებებით არის ცნობილი. 2017 წელს მან სამშობლო დატოვა და საცხოვრებლად აშშ-ში გადავიდა.