პენტაგონისთვის არაფერია ცნობილი იმის შესახებ, რომ „ისლამური სახელმწიფოს“ ტერორისტებს სირიაში 700 მძევალი ჰყავთ აყვანილი. ამის შესახებ თავდაცვის სამინისტროს ოფიციალურმა წარმომადგენელმა შონ რობერტსონმა განაცხადა.
„ჩვენ არ გვაქვს ინფორმაცია, რომელიც ადასტურებდეს დიდი რაოდენობით მძევლების არსებობას, რომელთა შესახებაც რუსეთის პრეზიდენტმა ვლადიმერ პუტინმა ისაუბრა. ჩვენ ამ განცხადებას სკეპტიკურად ვუყურებთ“, – განაცხადა რობერტსონმა.
შეგახსენებთ, რომ გუშინ, პუტინმა სირიაში, კერძოდ კი, მდინარე ევფრატის მარჯვენა ნაპირზე არსებულ სიტუაციაზე ისაუბრა.
„ამ ტერიტორიას ამერიკელები აკონტროლებენ, ისინი იქ ქურთების დაჯგუფებებს ეყრდნობიან, თუმცა რამდენიმე დასახლებულ პუნქტში კვლავ რჩებიან „ისლამური სახელმწიფოს“ წარმომადგენლები, რომლებმაც ბოლო დროს 700-მდე ადამიანი მძევლად აიყვანეს და ულტიმატუმი წამოაყენეს. ჩვენი ინფორმაციით, მძევალთა შორის აშშ-სა და ევროპის ქვეყნების მოქალაქეებიც არიან“, – განაცხადა პუტინმა.