ბერი გაბრიელ სალოსის ქუჩაზე ჩატარებული ანტიტერორისტული სპეცოპერაციიდან ერთი წელი გავიდა. ერთი წლის თავზე „პრაიმტაიმისთვის“ ცნობილი გახდა საერთაშორისო ტერორისტის, აჰმედ ჩატაევის დღემდე უცნობი მიმართვა თანამებრძოლებისა და პოტენციური ჯიჰადისტებისთვის. ჩვენ, ასევე, ხელში ჩაგვივარდა სპეცოპერაციის შემდეგ ჩატაევის კუთვნილი კომპიუტერიდან და მეხსიერების ბარათიდან ამოღებული შემზარავი კადრები, სადაც ასახულია, როგორ უსწორდებიან ჩატაევის თანამებრძოლები უდანაშაულო ადამიანებს. კადრები საკმაოდ შოკისმომგვრელია, ამიტომ ჩვენ მხოლოდ რამდენიმე მათგანის გამოქვეყნება გადავწყვიტეთ და ისიც მხოლოდ იმის საილუსტრაციოდ, რამდენად სასტიკ მეთოდებს იყენებდნენ აჰმედ ჩატაევი და „ისლამური სახელმწიფოს“ სხვა წარმომადგენლები.
ბერი გაბრიელ სალოსის ქუჩაზე ჩატარებული სპეცოპერაციის შემდეგ საერთო ჯამში 600-ზე მეტი ფაილია ამოღებული, მათ შორის გახლავთ ვიდეომიმართვა, სადაც ჩატაევთან ერთად გამოსახულნი არიან ერთი წლის წინათ სპეცოპერაციის დროს, ტერორიზმის ბრალდებით დაკავებული შოაიფ ბორზიევი და სპეცრაზმის მიერ ლიკვიდირებული იბრაგიმ ადაშევი, იგივე აბუ ჰურეიერა.
მიმართვაში აჰმედ ჩატაევი განმარტავს, რომ ამ ვიდეოს იღებს მხოლოდ ძმებისთვის, ანუ შიდა მოხმარებისთვის. მიმართვაში, ჩატაევი საქართველოსაც ახსენებს.
„ეს ვიდეო არის ძმებისთვის და არა გამოსაქვეყნებლად. ვალდებული ვარ, იცოდეთ, რას ვსაუბრობ. ამ გზაზე ჩვენ ერთნი ვართ და ერთმანეთს არ უნდა ვუღალატოთ. მე სადაც არ ვყოფილვარ, სხვადასხვა ქვეყანაში, ავსტრიაშიც და საქართველოშიც, ყველგან და ყოველთვის ვიყავი მუსლიმანი ძმების გვერდით. მათთვის არ მიღალატია. მთელ ჩემს ენერგიას ამ გზაზე ვხარჯავდი და ასე უნდა ვიყოთ მომავალშიც. ამ გზაზე მე, ან თქვენ შეიძლება მოვკვდეთ და ეს ყველა ძმამ უნდა ვიცოდეთ“, – ამბობს აჰმედ ჩატაევი მიმართვაში, რომლის ტექსტს „პრაიმტაიმი“ ექსკლუზიურად გთავაზობთ.
