შობის დადგომამდე რამდენიმე დღით ადრე სანტა კლაუსმა ტრადიციულად ყოველწლიური მიმართვა გაავრცელა.
2018 წელს სანტას განსაკუთრებული თხოვნა აქვს. ის ბავშვებს ბუნების დახმარებისკენ მოუწოდებს.
„როგორც იცით, მე ძალიან ვაფასებ ისეთ ღირებულებებს, როგორიცაა სიკეთე, სიხარული, მეგობრობა, ბუნების სიყვარული. ჩვენი მეგობარი ბუნება ამჟამად საფრთხეშია და ახლა ჩვენ ყველას ერთად შეგვიძლია, გავუკეთოთ მას საჩუქარი, ჩვენ შეგვიძლია ბუნების დახმარება. ბედნიერ შობას გისურვებთ ყველას“, – მიმართავს სანტა მსოფლიოს მოსახლეობას.
სანტას ოფისი, რომელიც ფინეთის ქალაქ როვანიემიდან 8 კილომეტრში მდებარეობს, ყოველწლიურად 500 000-მდე წერილს იღებს. მის სანახავად იქ პირადად ასობით ადამიანი ჩადის. ამის გამო სანტა კლაუსის ადგილსამყოფელი ფინეთის ერთ-ერთი ყველაზე პოპულარული ტურისტული ადგილია.