კირკიტაძის დაკავება კითხვის ნიშნებს არ მიჩენს, მთავარია, რა გაგრძელება ექნება ამ ყველაფერს, მე სულ ტყუილად ვყავდი დაკავებული “ნაციონალურ მოძრაობას” და სერიოზულ საქმეებს მიკერავდნენ არაერთხელ, – ამის შესახებ თიანეთის მუნიციპალიტეტის მერმა თამაზ მეჭიაურმა „ინტერპრესნიუსს“ განუცხადა.
როგორც მეჭიაურმა აღნიშნა, ქვეყანაში არ უნდა იყოს დაუსჯელობის განცდა და ცალმხრივი სამართალი.
„არავის დაკავებას არ მივესალმები, თუმცა კანონი უნდა აღსრულდეს როგორც პოზიციის, ასევე ოპოზიციის მისამართით. არავის უნდა ჰქონდეს არც დაუსჯელობის განცდა და მეორე მხრივ, არ უნდა ხდებოდეს პოლიტიკური ნიშნით დაკავება და ორმაგი სტანდარტი. რასაც მე თვალი მივადევნე, კირკიტაძე მინებს ამტვრევდა, ძალიან არასერიოზული შთაბეჭდილება დატოვა. რამდენად არის ეს დასჯადი, იურისტების გადასაწყვეტია. კირკიტაძის დაკავება კითხვის ნიშნებს არ მიჩენს, მთავარია რა გაგრძელება ექნება ამ ყველაფერს. მე სულ ტყუილად ვყავდი დაკავებული “ნაციონალურ მოძრაობას” და სერიოზულ საქმეებს მიკერავდნენ არაერთხელ. ასე რომ, იმასთან შედარებით კირკიტაძის დაკავება არაფერია. თუმცა, ნიშნის მოგებით არ მინდა ვთქვა და ნამდვილად არ მივესალმები, რომ პოლიტიკური დაპირისპირება სისხლის სამართლის დევნაში გადადიოდეს, მაგრამ დაუსჯელობის სინდრომიც არ შეიძლება ქვეყანაში იყოს, ისევე, როგორც ცალმხრივი სამართალი”,- განაცხადა მეჭიაურმა.
“ინტერპრესნიუსი”