საქართველოს ყოფილი პრეზიდენტი მიხეილ სააკაშვილი „ფეისბუქში“ წერს, რომ ახალ მოძრაობას #ერთადსახლში იწყებს.
სააკაშვილი „ფეისბუქში“ ვიდეოს ავრცელებს, რომელშიც მიმართავს ემიგრანტებს, რომ დიდი ტალღა უნდა ააზვირთონ, რომლებმაც გაზაფხულამდე უნდა მიაღწიონ საქართველომდე. სააკაშვილი მათ პირდება, რომ საქართველოში გაყვება.
“მე შემოვივლი უკლებლივ ყველა ცენტრს, სადაც არიან ქართველები, შეგხვდებით თითოეულ თქვენგანს, ჩაგხედავთ თვალებში, ჩავკიდოთ ერთმანეთს ხელები და წავიდეთ ჩვენი სამშობლოს დასაბრუნებლად, წავიდეთ ამ კოშმარის და ამ საოცრების დასასრულებლად, საქართველო იმსახურებს ბევრად მაგარ რაღაცას და ჩვენ ვიმსახურებთ, გვქონდეს მაგარი სამშობლო“, – აცხადებს სააკაშვილი.
გავრცელებულ მიმართვაში სააკაშვილი უკვე საუბრობს საკუთარ თავზე და გრიგოლ ვაშაძეს საერთოდ აღარ ახსენებს.
ცნობისთვის:
მიხეილ სააკაშვილი საპრეზიდენტო უფლებამოსილების დასრულების შემდეგ ქართულ მართლმსაჯულებას საქართველოს ფარგლებს გარეთ ემალება. ის დისტანციურად ცდილობდა ემართა პროცესები საქართველოში საპრეზიდენტო არჩევნების დროს და მხარდამჭერებს დაუმორჩილებლობისკენ მოუწოდებდა, თუმცა ამ შემთხვევაში მის გეგმას თანაპარტიელებში ადეკვატური მხარდაჭერა ვერ მოჰყვა.
მიხეილ სააკაშვილს რამდენიმე სისხლის სამართლის საქმეზე საქართველოს პროკურატურა ედავება და მის ექსტრადიციას ითხოვს. აქედან ერთ-ერთ საქმეზე, კერძოდ, სანდრო გირგვლიანის მკვლელობაში ბრალდებულთა შეწყალების საქმეზე 5 იანვარს ქართულმა სასამართლომ სააკაშვილს დაუსწრებლად 4 წლით თავისუფლების აღკვეთა მიუსაჯა. ამნისტიით მას სასჯელი 1/4-ით შეუმცირა და 3 წლით პატიმრობა დარჩა.
28 ივნისს კი სასამართლომ ვალერი გელაშვილის ცემის ფაქტზე სააკაშვილს 8 წლით, ამნისტირებული მუხლების გათვალისწინებით კი – 6 წლით თავისუფლების აღკვეთა მიუსაჯა.
სააკაშვილს, რომელსაც არცერთი ქვეყნის მოქალაქეობა არ აქვს 2018 წლის თებერვალში მეუღლის სანდრა რულოვსის სამშობლომ, ნიდერლანდებმა ევროკავშირში ცხოვრებისა და მუშაობის უფლება მისცეს.