საქართველოს პრემიერ-მინისტრ მამუკა ბახტაძის განცხადებით, ოპოზიციის ბრალდებებთან დაკავშირებით წინა გამოცდილება იძლევა საშუალებას, ითქვას, რომ ხშირ შემთხვევაში „საქმე გვაქვს ფეიქნიუსთან“. ამის შესახებ მამუკა ბახტაძემ მთავრობის სხდომის დაწყებამდე გამართულ პრესკონფერენციაზე განაცხადა.
პრემიერ-მინისტრი გამოეხმაურა ინფორმაციას იმის შესახებ, რომ არჩევნების შემდეგ, საქართველოს პრეზიდენტი სალომე ზურაბიშვილი შემოწირულობებს კვლავ იღებს და ოპოზიციას აქვს ეჭვი, რომ აღნიშნული შემომწირველი კომპანიები ტენდერებში იმარჯვებენ.
„თუ ოპოზიციას აქვს ეჭვი და აქვს კონკრეტული ფაქტები, პირველ რიგში, მე ვიქნები დაინტერესებული, რომ ეს ფაქტები მოვისმინოთ. ჩვენ ბევრჯერ მოგვისმენია მათგან მსგავსი ბრალდებები და სამწუხაროდ, შემდეგ ეს აღმოჩენილა ფეიკნიუსი. ჩვენ გვაქვს პროცესი, რომელიც მიმდინარეობს. არჩევნების დასრულებით ქვეყნაში არც ეკონომიკური და არც სოციალური ცხოვრება არ სრულდება. ეს პროცესი არის მუდმივი და აქედან გამომდინარე, ჩვენ თითოეულ ქეისს ცალკე უნდა ჩავუღრმავდეთ. თუ მასში გამოიკვეთება რაიმე დეტალი, თუკი სამოქალაქო საზოგადოება, ან ოპოზიციური პარტიები აღმოაჩენენ მასში რაიმე კონკრეტულ ეპიზოდს, რომელიც გამაგრებული იქნება შესაბამისი არგუმენტებით, გაძლევთ პირობას, რომ ვიქნები პირველი დაინტერესებული, პროცესი განვიხილოთ“, – აღნიშნა ბახტაძემ.