კახა ბექაური – ბაზარზე არსებულ ოპერატორებს არ მივცემთ საშუალებას, რომ საკუთარი ძალაუფლება მომხმარებელზე ბოროტად გამოიყენონ

ბაზარზე არსებული წინასწარი მდგომარეობით, არანაირი საფუძველი არ არსებობს იმისა, რომ ფასები გაიზარდოს, – ამის შესახებ კომუნიკაციების ეროვნული კომისიის თავმჯდომარემ, კახა ბექაურმა, საკომუნიკაციო კომპანიების ნაწილის მხრიდან ტარიფების გაზრდასთან დაკავშირებით განაცხადა.
ბექაურის თქმით, კომისიას აქვს ყველანაირი ბერკეტი, რომ ოპერატორების მხრიდან არაკანონზომიერი ქმედება აღკვეთოს.
“ჩვენ ყველანაირი ბერკეტი გვაქვს, თუ ასეთ არაკანონზომიერ ქმედებას ექნება ადგილი, ეს ქმედება აღვკვეთოთ. ვიმედოვნებ, რომ კომპანიები არ გააკეთებენ ამას და ვიდრე კომისიასთან არ გაივლიან ამ საკითხებს, არ გააძვირებენ ტარიფებს. წინააღმდეგ შემთხვევაში, ბაზარზე არსებული მნიშვნელოვანი ძალაუფლების მქონე ოპერატორებს არ მივცემთ საშუალებას, რომ საკუთარი ძალაუფლება მომხმარებელზე ბოროტად გამოიყენონ და ორი-სამი თვის განმავლობაში მაინც, დავაბრუნებთ მათ კანონზომიერების ჩარჩოებში, რადგან გვაქვს ამის ბერკეტები”, – განაცხადა კახა ბექაურმა.
კომისიის თავმჯდომარე არ გამორიცხავს, რომ კომპანიების მიერ დაანონსებული სატარიფო ცვლილებები კომისიის მიერ ბოლო პერიოდში მიღებულ გადაწყვეტილებებს უკავშირდებოდეს.
„ბაზარზე აქამდე, გარკვეულწილად, განუკითხაობა იყო, ტარიფი ტარიფი არ იყო, ხარისხი ხარისხი არ იყო, რასაც აწვდიდნენ მომხმარებლებს. ეს ყველაფერი მოწესრიგების პროცესშია და დასრულების ეტაპზეა. როგორც ჩანს, გარკვეული დისკომფორტი შეექმნათ, იქიდან გამომდინარე, რასაც აქამდე ახორციელებდნენ და გარკვეულ გადაწყვეტილებებს იღებენ ამ მიმართულებით”, – აღნიშნა კახა ბექაურმა.
ცნობისთვის, „სილქნეტის“ “ჯეოსელისა” და „მაგთის“ აბონენტთა ნაწილისთვის ტარიფები იზრდება. ამის შესახებ კომპანიების ოფიციალურ ვებ-გვერდებზე ინფორმაცია უკვე გავრცელდა.