გაუგებარია, რა შუაშია „თიბისი ბანკის“ დამფუძნებელ მამუკა ხაზარაძესთან და მის საქმესთან „ტვ პირველი“, რა კავშირი აქვს მას ტელევიზიასთან, – ამის შესახებ „ქართული ოცნების“ ოფისში გამართულ ბრიფინგზე საპარლამენტო უმრავლესობის წევრმა არჩილ თალაკვაძემ მამუკა ხაზარაძის მიერ სასამართლოში მიტანილ წერილთან დაკავშირებით განაცხადა, რომელიც დღეს პროკურატურამ გამოაქვეყნა.
ამასთან, თალაკვაძის თქმით, კითხვა აქვს “ტვ პირველის” ჟურნალისტებთან, აქვს თუ არა მათზე რამე ბერკეტი ან გავლენა მამუკა ხაზარაძეს.
მისი თქმით, გამოძიების პარალელურად პარლამენტში მიეცათ ბანკის დაფმუძნებლებს საშუალება, რომ ღიად ესაუბრათ საქმესთან დაკავშირებით.
„ამ სხდომაზე ჩვენ მოვისმინეთ ღია ბრალდება ასევე, თითქოს, ხელისუფლების წარმომადგენელი ბანკის დამფუძნებლებს დაემუქრა და თითქოს არსებობს ამის დამადასტურებელი წერილიც. ბუნებრივია ჩვენი პირველი და ლოგიკური მოთხოვნა იყო, ეს წერილი უნდა ყოფილიყო სათანადო წესით წარმოდგენილი“, – განაცხადა თალაკვაძემ.
მისი შეფასებით, აშკარაა, რომ წერილი, რომელზეც იყო საუბარი, რეალურად არის ფურცელზე ამობეჭდილი ტექსტი, რომელსაც მთავარი მაიდენტიფიცირებელი ნიშნები, თუ ვის გაეგზავნა და ვისგან იყო გაგზავნილი – არ აქვს.
„რა უნდა ჩავთვალოთ მთავარ მტკიცებულებად, რეალურად, ჩვენ ვნახეთ ამობეჭდილი ქაღალდის ასლი, რომლის არც ავტორი ჩანს, არც შედგენის თარიღი და არც რაიმე მაიდენტიფიცირებელი ნიშანი ამ მოცემულობით წერილს არ გააჩნია. იმასაც კი არ გვეუბნებიან, თუ ვინ მიუტანა თუნდაც ეს ამობეჭდილი ფურცელი ბანკის დამფუძნებლებს.
ასევე, თუ შინაარსში შევალთ და წერილის ასლი, რომელიც საზოგადოებისტვის ხელმისაწვდომია, გაუგებარია საერთოდ რა შუაშია ბატონ ხაზარაძესთან და მის საქმესთან “ტვ პირველი”. რა კავშირი აქვს მას ტელევიზიასთან?! როგორც ვიცით ხაზარაძე ამ ტელევიზიის არც მფლობელია, არც დირექტორი და არც რაიმე სხვა სახის კავშირი მას არ აქვს ამ ტელევიზიასთან. რა თქმა უნდა გვსურს ვკითხოთ “ტვ პირველის” ჟურნალისტებსაც რაიმე ბერკეტი ან გავლენა აქვს თუ არა ბატონ ხაზარაძეს მათზე? ვინაიდან ეს წერილი იქნა მოყვანილი მტკიცებულებად და მის შინაარსში კი ასეთ რამეს ვკითხულობთ. როგორ, ან რა ფორმით უნდა მოეხდინა მათზე ზეგავლენა? საინტერესოა ამაზე ტელევიზიის წარმომადგენლებმაც გვიპასუხონ“, – განაცხადა თალაკვაძემ.
მისივე თქმით, გაუგებარია, „არტარეა“ს საკითხიც, რა შუაშია პოლიტიკასთან, თუნდაც თეორიულადაც კი რაში შეიძლება უშლიდეს ხელს ხელისუფლებას არხი, რომელიც ყველამ კულტურაზე და ხელოვნებაზე აკეთებს გადაცემებს და საჯარო ლექციებს გადმოსცემს.