არ მჯერა, რომ ჩვენი მოსახლეობის ნახევარზე მეტს წარმოდგენა არ აქვს, თუ რომელ პოლიტიკურ პარტიას დაუჭერს მხარს, -ასე გამოეხმაურა შს მინისტრის მოადგილე, “ქართული ოცნების“ გუნდის წევრი არჩილ თალაკვაძე NDI-ის კვლევის შედეგს, რომლის თანახმადაც მოსახლეობის 57%-ს ჯერ კიდევ არ აქვს გადაწყვეტილი, თუ რომელ პარტიას მისცემს ხმას 8 ოქტომბერს.
„მე ვერ დავეთანხმები ამ შეფასებას, ის არის ძალიან ცალმხრივი, არ მჯერა, რომ ჩვენი მოსახლეობის ნახევარზე მეტს წარმოდგენა არ აქვს, თუ რომელ პოლიტიკურ პარტიას დაუჭერს მხარს. ვფიქრობ, რომ გარკვეული პროცენტი მართლაც არის ასეთი, მაგრამ დიდია ალბათობა, რომ ბევრმა ადამიანმა ჯერ არ უპასუხა ამ კითხვას, იმიტომ რომ დროა დარჩენილი, პროგრამები არ უნახავთ და ამასთან, მათ არ აქვთ დიდი ნდობა კვლევით ორგანიზაციების მიმართ, ასე რომ ნუ გაგვიკვირდება თუ ყველა მოქალაქემ არ უპასუხა, თუ ვის აძლევს ხმას. ასევე ცოტა არასერიოზულად მიმაჩნია, როცა რომელიმე პარტია ამბობს, რომ “გადაუწყვეტელი ამომრჩეველი“ მთლიანად მისია – ეს ასე ვერ იქნება.
ჩვენ ვფიქრობთ, რომ ამ სეგმენტთან ძალიან ბევრს ვიმუშავებთ ძალიან ძლიერი პროგრამა გვაქვს დამუშავებული, ბევრი შეხვედრა გვაქვს დაგეგმილი და გვყავს ძალინ კარგი განახლებული გუნდი, რომელიც მოახერხებს რომ ადამიანებთან მიიტანოს ის, რის გაკეთებასაც ჩვენ ვგეგმავთ“, -განაცხადა თალაკვაძემ.
თალაკვაძემ ამავე ორგანიზაციის მიერ, 2012 წელს ჩატარებული პოლიტიკური კვლევების შედეგებიც გაიხსენა.
“თუ გავიხსენებთ 2012 წლის კვლევის შედეგებს, მაგალითად 2012 წლის ივნისში სწორედ NDI-ის კვლევის შედეგით “ქართულ ოცნებას“ ჰქონდა 18% რეიტინგი, იმავე წლის აგვისტოში კიდევ უფრო დაბალი რეიტინგი აჩვენა ამ კვლევამ – ეს იყო 12% , რეალურად, არჩევნებზე “ქართულმა ოცნებამ მოსახლეობის ხმების 54% პროცენტზე მეტი მიიღო“, -აღნიშნა თალაკვაძემ.