მონიტორინგის ცენტრი “მედიატორის” მიერ გავრცელებული ინფორმაციის თანახმად, ბოლო ოთხ თვეში საჯარო სამსახურებმა ფუფუნების საგნებში სოლიდური თანხა დახარჯეს.
მათი ცნობით, ყველაზე მეტი ფუფუნების საგანი საჯარო უწყებებიდან შინაგან საქმეთა სამინისტრომ დახარჯა, მეორე-მესამე ადგილებს ბათუმისა მერია და წყალტუბოს მუნიციპალიტეტი ინაწილებენ. საქმით დაინტერესებისკენ აუდიტის სამსახურს მოუწოდებს ოპოზიცია.
“ექსკლუზივ ნიუსი” შსს-ს პრეს-სამსახურს დაუკავშირდა და გავრცელებულ ინფორმაციაზე კომენტარი სთხოვა.
შინაგან საქმეთა სამინისტროში მიმდინარე საპოლიციო ინფრასტრუქტურის განახლების ფარგლებში, საქართველოს სხვადასხვა რეგიონში შენდება ახალი პოლიციის შენობები, რომლებიც სათანადო საოფისე ინვენტარით აღჭურვას საჭიროებს.
ამასთანავე, ბუნებრივია, რომ მთელი საქართველოს მასშტაბით განლაგებულ პოლიციის დეპარტამენტებს პერიოდულად, ბუნებრივი ცვეთის გათვალისწინებით, ესაჭიროება ამორტიზირებული საოფისე ინვენტარის განახლება.
საპოლიციო დანაყოფები სამსახურებრივ მოვალეობას 24 საათიან რეჟიმში ასრულებენ და შესაბამისად, პოლიციელებისთვის ნორმალური სამუშაო პირობების შექმნას სამინისტრო დიდ მნიშვნელობას ანიჭებს. ამასთანავე უნდა აღინიშნოს, რომ შინაგან საქმეთა სამინისტროს მიერ პოლიციელებისთვის შეძენილი ინვენტარი – საოფისე მაგიდები და სკამები ნამდვილად არ შეიძლება, რომ მივაკუთვნოთ ფუფუნების საგნებს.