ბლოკი “ევროპული საქართველო-თავისუფალი დემოკრატების” მთაწმინდის მაჟორიტარობის კანდიდატის შალვა შავგულიძის განცხადებით, საჭიროა ბიძინა ივანიშვილის ხელისუფლების შეცვლა, ამიტომ მნიშვნელოვანია 9 ივნისს, არჩევნებზე ამომრჩეველმა იაქტიუროს. როგორც შავგულიძემ ჟურნალისტებს განუცხადა, რაც შეიძლება მეტი ამომრჩეველი უნდა მივიდეს მეორე ტურში არჩევნებზე.
მისივე თქმით, ასეთ შემთხვევაში ხელისუფლება ვერ შეძლებს მასიურად გამოხატული ხალხის ნების “მაქინაციებით” განეიტრალებას.
“არჩევნები, ეს მართლაც არის უმნიშვნელოვანესი დემოკრატიული პროცესი, რა დროსაც ხალხი უშუალოდ ირჩევს ხელისუფლების წარმომადგენლებს და მთაწმინდაზე ხვალ ასეთი დღეა. რაც შეეხება მოლოდინებს, მინდა, მივმართო მთაწმინდის ოლქის ამომრჩეველს, სწორედ, ამ მოლოდინიდან გამომდინარე, რომ ვისაც მიგვაჩნია,საჭიროა ივანიშვილის ხელისუფლების შეცვლა, არ ვართ წინააღმდეგინი, რომ ეს მთაწმინდის საარჩევნო ოლქიდან დაიწყოს, ამისთვის ამ ნების გამოხატვაა საჭირო. ასევე საჭიროა,ხვალ არჩევნებზე, რაც შეიძლება მეტი ადამიანი მივიდეს და დავაფიქსიროთ ჩვენი პოზიცია. მხოლოდ ეს არის გამარჯვების გასაღები”, – განაცხადა შალვა შავგულიძემ.