საქართველოს პრეზიდენტი სალომე ზურაბიშვილი სამუშაო ვიზიტით პოლონეთის რესპუბლიკას სტუმრობს.
სალომე ზურაბიშვილი ვარშავაში, მსოფლიოს სხვადასხვა ქვეყნის ლიდერებთან ერთად, მეორე მსოფლიო ომის დაწყებიდან 80 წლის იუბილესთან დაკავშირებულ ღონისძიებებში მიიღებს მონაწილეობას.
ამასთან ერთად, სამუშაო ვიზიტის ფარგლებში საქართველოს პრეზიდენტი რამდენიმე მნიშვნელოვან შეხვედრას გამართავს. პრეზიდენტის პრესსამსახურის ინფორმაციით, სალომე ზურაბიშვილი ვარშავაში უკრაინის პრეზიდენტს ვოლოდიმირ ზელენსკის შეხვდება, შვედეთის სამეფოს პარლამენტის სპიკერს ანდრეა სნორლენს, ბულგარეთის რესპუბლიკის პრეზიდენტ რუმენ რადევს, ესტონეთის რესპუბლიკის პრეზიდენტ კერსტი კალიულაიდის, ბელგიის სამეფოს პრემიერმინისტრ შარლ მიშელს, სლოვაკეთის რესპუბლიკის პრეზიდენტ ზუზანა ჩაპუტოვას.
დღის ბოლოს სალომე ზურაბიშვილი დაესწრება პოლონეთის რესპუბლიკის პრეზიდენტის ანჯეი დუდას სახელით გამართულ სადილს, რომელიც მიწვეული სტუმრების პატივსაცემად იმართება და ასევე კონცერტს, რომელიც მეორე მსოფლიო ომის დაწყებიდან 80 წლისთავს ეძღვნება.
2 სექტემბერს სალომე ზურაბიშვილი სიტყვით გამოვა გამოფენის „50 ქალი საქართველოდან“ გახსნაზე, რომელიც პოლონეთის რესპუბლიკის სენატშია დაგეგმილი. ამასთან ერთად, სალომე ზურაბიშვილი გამოვა სიტყვით კონფერენციაზე „ქალთა როლი პოლიტიკაში“.
საქართველოს პრეზიდენტი ასევე დაესწრება კონსტანტინე ციციშვილის გამოფენას საქართველოს საელჩოში.