ვერც ერთი ხელისუფლება, რა შედეგიც არ უნდა დადოს, გინდა მოკლევადიანი, გინდა გრძელვადიანი, ვერ იქნება წარმატებული, სანამ სიღარიბის და ოკუპაციის გამოწვევა იქნება, – ამის შესახებ ყოფილმა პრემიერ-მინისტრმა მამუკა ბახტაძემ თოქ-შოუების წამყვანებთან შეხვედრისას განაცხადა.
გადაცემა „360 გრადუსის“ წამყვანის შეკითხვაზე, 1 წელი და 2 თვე პრემიერ-მინისტრობისთვის ცოტა, ბევრი თუ საკმარისი პერიოდია, მამუკა ბახტაძემ უპასუხა, რომ ეს პერიოდი იყო საკმარისი იმ მიზნების განხორციელებისთვის, რისთვისაც ის ამ პოსტზე აირჩიეს.
„მე ამოვდივარ მიზნებიდან. ეს იყო საკმარისი, რომ განგვეხორციელებინა ის მიზნები, რისთვისაც მე ამ პოსტზე ამირჩიეს.
ვერც ერთი ხელისუფლება, რა შედეგიც არ უნდა დადოს, გინდა მოკლევადიანი, გინდა გრძელვადიანი, ვერ იქნება წარმატებული, სანამ სიღარიბის და ოკუპაციის გამოწვევა იქნება. ძალიან არასწორი იქნება, თუ რომელიმე ხელისუფლება თავის თავს წარმატებულს უწოდებს, როდესაც ქვეყანაში არის ან ერთი გამოწვევა, ან მეორე. ყველაზე ნაკლებად სადაც ვფიქრობდი, რომ ჩემი თავი წარმომედგინა, ეს იყო ქართული პოლიტიკა, მაგრამ სწორედ იმ მიზნებიდან გამომდინარე, რომელიც აღვნიშნე, მაშინ გუნდში ჩვენ ერთობლივად მივიღეთ გადაწყვეტილება. ეს დრო საკმარისი იყო იმისთვის, რომ ეს სტრატეგიული განვითარების ჩარჩო მოგვემზადებინა, დაგვეწყო მისი დანერგვა და უზრუნველგვეყო მისი მდგრადობა, რომელიც დღეს გამყარებულია ჩვენი კანონებით და საერთაშორისო ხელშეკრულებებით,“ – განაცხადა მამუკა ბახტაძემ.