ლევან ნიკოლეიშვილი – სტვენით გაპროტესტება ოპოზიციის არჩეული ფორმაა

უკეთესი იქნებოდა ოპოზიციის წარმომადგენლები დასწრებოდნენ საკომიტეტო მოსმენებს, მინისტრობის კანდიდატებისთვის დაესვათ კრიტიკული შეკითხვები, მოესმინათ პასუხები, მათთვის გარკევული რეკომენდაციები მიეცათ, – ამის შესახებ ექსპერტმა სამხედრო საკითხებში ლევან ნიკოლეიშვილმა მედიაჰოლდინგ „კვირას“ პრესკლუბში სტუმრობისას განაცხადა.
ლევან ნიკოლეიშვილი პარლამენტის კომიტეტებში მინისტრობის კანდიდატების მოსმენებსა და ოპოზიციის პროტესტს გამოეხმაურა.
„ჩემთვის, როგორც მოქალაქისთვის, გულდასაწყვეტია ოპოზიციის განწყობა, რომ არ ესწრებიან საკომიტეტო სხდომებს. ვიცით, რომ მათ თავიანთი ამომრჩეველი ჰყავთ და ეს ერთგვარ ღალატადაც კი მიმაჩნია მათი ამომრჩევლის მიმართ. რაღაცის სასტვენით, სტვენით გაპროტესტება გასაგებია, მათი არჩეული ფორმაა, მაგრამ უკეთესი იქნებოდა ისინი დასწრებოდნენ საკომიტეტო მოსმენებს, წარდგენილი კანდიდატებისთვის დაესვათ კრიტიკული შეკითხვები, მოესმინათ პასუხები. გარდა კრიტიკული შეკითხვებისა, მიეცათ გარკვეული რეკომენდაციები, თუნდაც შენიშვნები. ეს არის ჯანსაღი პროცესი. ვინაიდან საკითხები, რომლებიც მთავრობამ წარმოადგინა, ძალიან მნიშვნელოვანია, მათ შორის არის რამდენიმე საკითხი, რომლებიც მიუხედავად იმისა, ადამიანები ოპოზიციაში არიან თუ ხელისუფლებაში, სასიცოცხლოდ მნიშვნელოვანია ქვეყნისთვის. ისეთი, როგორებიცაა: ოკუპაცია, ევროატლანტიკური ინტეგრაცია, თავდაცვა და ა.შ“, – განაცხადა ლევან ნიკოლეიშვილმა.
ცნობისთვის, დღეს პარლამენტის კომიტეტებში მინისტრობის კანდიდატებს უსმენენ.
6 სექტემბერს კი მთავრობის ახალი შემადგენლობის მოსმენა ფრაქციების ფორმატში გაგრძელდება და პრემიერ-მინისტრობისა და მინისტრობის კანდიდატებს „ნაციონალური მოძრაობისა“ და „ევროპული საქართველოს“ ფრაქციები მოუსმენენ.
7 სექტემბერს მთავრობის ახალ შემადგენლობას „პატრიოტთა ალიანსის“ და „სოციალ-დემოკრატების“ ფრაქციები და ასევე საპარლამენტო უმრავლესობაში შემავალი ფრაქციები მოუსმენენ.
8 სექტემბერს კი პარლამენტის პლენარული სხდომაა დანიშნული, რომელზეც განიხილება საქართველოს მთავრობისათვის ნდობის გამოცხადების საკითხი.