“ჩემთვის შეურაცხმყოფელი იყო, როგორც ყოფილი შს მინისტრისთვის, როცა ტელეეთერში „გირჩის“ მიერ მარიხუანას კულტივაციის დემონსტრირება და დარგვა ვნახე. კანონი უკაცრავად და თავზე დაგვახიეს”– ამის შესახებ თავდაცვის მინისტრობის კანდიდატმა ირაკლი ღარიბაშვილმა პარლამენტში გაერთიანებული კომიტეტების სხდომაზე დეპუტატ ლევან გოგიჩაიშვილის დასმული კითხვის საპასუხოდ განაცხადა.
„ბოლო 3 წელი, რაც მოხდა ქვეყანაში და ხელისუფლების მუშაობაში, მე აბსოლუტურად არ მიმიღია მონაწილეობა, შესაბამისად, აბსოლუტურად არაფერზე არ ვიღებ პასუხისმგებლობას, ის, რაც განვითარდა ბოლო 3 წელში, რაც თქვენ გააკეთეთ, თუ არ გააკეთეთ, თქვენი მოქმედებით თუ უმოქმედობით… თქვენ ახსენეთ „გირჩის“ თემა. 2016 წელს ჩემთვის აბსოლუტურად შეურაცხმყოფელი იყო, როგორც ყოფილი შს მინისტრისთვის, როცა მე ვნახე ტელეეთერში ამ სექტის მიერ მარიხუანას კულტივაციის რაღაც დემონსტრირება და დარგვა. კანონი უკაცრავად და თავზე დაგვახიეს. მე არ მახსენდება, არც თქვენგან საჯარო გამოსვლები, არავისგან აბსოლუტურად. 3 წლის შემდეგ რომ ვსაუბრობთ ახლა, დიდი ბოდიში, მაგრამ დაგვიანებულია. აი, ეს თქვენმა ასეთმა უმოქმედობამ განაპირობა.
აქედან გამომდინარე, ცოტა უხერხულია მგონი თქვენგან ამ თემაზე საუბარი, თუმცა დაგვიანებული არ არის. შეგვიძლია ახლაც ერთად ვიმუშავოთ და ჩაერთეთ თქვენც ახალი საკითხების მოგვარებაში“ – მიმართა ირაკლი ღარიბაშვილმა ლევან გოგიჩაიშვილს.
შეგახსენებთ რომ, ლევან გოგიჩაიშვილმა ირაკლი ღარიბაშვილს, შემედი სიტყვებით მიმართა: „ის კი არ არის პრობლემა, რომ ადამიანები საკანონმდებლო ხარვეზით სარგებლობენ და ამას პირად სარგებლობაში გადაიტანენ, ეს არის გამომდინარე იმ უხერხემლობით, რომელიც შეიძლება გარკვეულწილად მეც საკუთარ თავზე ავიღო, ჩვენ ვიყავით, როცა უმრავლესობის წევრი ვიყავი, ეს პროცესი თავდაცვის კომიტეტში დავიწყეთ და ის, რომ ეს კანონპროექტი არ დაილუქა და ხარვეზი არ აღმოიფხვრა, „გირჩის“ ბრალი კი არ არის, ეს არის უმრავლესობის უხერხემლობის ბრალი.“