ირაკლი ღარიბაშვილი – სექტის წარმომადგენლებს მცდელობა აქვთ, ქვეყნის ორ მთავარ ფუნდამენტს, სარწმუნოებას და ჯარს შეუტიონ

თავდაცვის მინისტრობის კანდიდატის ირაკლი ღარიბაშვილის თქმით, ხელისუფლებამ არ უნდა მიაქციოს ყურადღება „გირჩის“ ანტისახელმწიფოებრივ, ანტიეროვნულ, პროვოკაციულ წამოწყებებს.
„მე აღარ მინდა უღირსი ადამიანების შეურაცხყოფებს ვუპასუხო. უკვე გამოგვეხმაურნენ სექტის წარმომადგენლები. მე გეტყვით შემდეგს, რომ ჩვენი ქვეყანა თუ მოვიდა დღემდე, იდგა სარწმუნოებასა და ჩვენ ჯარზე, ჩვენს უკვდავ მეომრებზე.
ეს უღირსი ადამიანები, ამ ორ მთავარ ფუნდამენტს ურტყამენ და ანგრევენ, მცდელობა აქვთ. ეს არის 0,1 პროცენტი. მე ბედნიერი ვარ, რომ მივეკუთვნები აბსოლუტურ უმრავლესობას, რომელიც სხვანაირად ფიქრობს. აქედან გამომდინარე, ჩვენ არ უნდა მივაქციოთ ყურადღება მათ ანტისახელმწიფოებრივ, ანტიეროვნულ, პროვოკაციულ წამოწყებებს. ჩვენ უბრალოდ უნდა გავაკეთოთ ჩვენი საქმე როგორც მიგვაჩნია სწორად. მე მჯერა, რომ პარლამენტის უმრავლესობა ასე ფიქრობს“, – განაცხადა ირაკლი ღარიბაშვილმა.
ამასთან ირაკლი ღარიბაშვილმა აღნიშნა, რომ მინისტრად დანიშვნის შემთხვევაში დაუყოვნებლივ დაიწყებს მუშაობას კანონპროექტის შემუშავების საკითხზე, რომელიც „საკითხს მოაგვარებს“.
ამასთან ირაკლი ღარიბაშვილის თქმით, მისი მთავარი საზრუნავი იქნება ეროვნული პატრიოტული სულისკვეთების გაღვივება.