საქართველოს პრეზიდენტმა სალომე ზურაბიშვილმა ორბელიანის განახლებულ სასახლეში პირველად, მაღალი რანგის სტუმარს – უნგრეთის პრეზიდენტს იანოშ ადერის უმასპინძლა.
როგორც პრეზიდენტმა ერთობლივ პრესკონფერენციაზე განაცხადა, შეხვედრის პირველი თემა, ტრადიციულად, ოკუპირებული ტერიტორიები და საოკუპაციო ხაზზე არსებული სიტუაცია იყო.
„ვილაპარაკე ამ ზაფხულში განვითარებულ მოვლენებზე და ამ კონფლიქტის მშვიდობიანად გადაწყვეტის აუცილებლობაზე. რაც მიზნის მისაღწევად ყველა ჩვენი პარტნიორი ქვეყნის ჩართულობას მოითხოვს.
მადლობა მოვახსენე, ჩვენ უნგრელ მეგობარს სადამკვირვებლო მისიაში მონაწილეობისათვის. ევროკავშირის სადამკვირვებლო მისიაში – 14 უნგრელია წარმოდგენილი. ხაზი გავუსვით იმასაც, რომ აუცილებელია ამ მისიამ შეძლოს თავისი სრულყოფილი მანდატის შესრულება – რაც ნიშნავს იმას, რომ ჰქონდეს საშუალება, ზედამხედველობა მთლიან ტერიტორიაზე განახორციელოს. 2008 წლის შეთანხმება უნდა იყოს შესრულებული.
საზღვრის ორივე მხარეს მყოფი მოქალაქეების მდგომარეობა, ჩვენი ყოველდღიური საზრუნავია. ჩვენ გვჭირდება ჟენევის ფორმატის განახლება, გაძლიერება, რომ შესაძლებელი გახდეს ისეთი პოლიტიკური მოლაპარაკებების დაწყება, რომელიც მიმართული იქნება ამ სიტუაციის გადაწყვეტისკენ და ესკალაციის მოხსნისკენ.
ვაფასებთ უნგრეთის მხარდაჭერას საქართველოს ტერიტორიული მთლიანობის საკითხის მიმართ ყველა ფორმატში. უნგრეთი მხარს უჭერს ყველა ჩვენ რეზოლუციას ამ საკითხთან მიმართებით და ეს არის ძალიან მნიშვნელოვანი, რადგან ჩვენი გზა ევროკავშირისა და ნატოსკენ უცვლელია.
ბატონი პრეზიდენტი ესტუმრება საოკუპაციო ხაზს, ესტუმრება სადამკვირვებლო მისიას. მნიშვნელოვანია, თუ რამდენად ვიღებთ უნგრეთის მხარდაჭერას ამ კუთხით. ასევე, ევროკავშირის ფორმატში ვიცით, რომ შეგვიძლია გვქონდეს უნგრეთის მხარდაჭერის იმედი ახალ ეტაპზე, რომელიც ახლა იწყება: ახალი კომისიით, ახალი პარლამენტით, ახალი პარტნიორობის ასევე გვიჭერს მხარს უნგრეთი ნატოში ინტეგრაციის გზაზე და ამისთვისაც მადლობა გამოვუცხადე პრეზიდენტს.
აქვე იმედს გამოვთქვამ, რომ ლონდონის სამიტში საქართველო შეძლებს იყოს წარმოდგენილი ნატო-საქართველოს ფორმატში და აქაც უნგრეთის მხარდაჭერა ძალიან მნიშვნელოვანია.
ბატონ იანოშ ადერთან ერთად ასევე, განვიხილეთ დღეს უნგრეთ-საქრთველოს ორმხრივი ურთიერთობები, რომელიც ძალიან იზრდება. Wizz Air-ის ფრენები საქართველოს მიმართულებით არის ერთ-ერთი ძალიან სეიროზული ინსტრუმენტი, რომელიც გვეხმარება იმ ტურისტულ ბუმში, რომელიც ბოლო წლებში საქართველოს ეკონომიკას ახასიათებს და რომელიც უნდა გაგრძელდეს, გაძლიერდეს.
ძალინ მნიშვნელოვანი იქნება იმ გამოცდილების გაზიარება, რაც უნგრეთს აქვს სხვადასხვა ტურისტული მიმართულებით – ბალნეოთერაპია, სპა კურორტები, სამკურნალო ტურიზმი. უნგრულმა მხარემ ამ მიმართულებით მუშაობის დაწყება შემოგვთავაზა. საუბარი იყო ასევე, სტუდენტების გაცვლებზე.
განათლება ის სფეროა, რომელშიც უკვე წარმატებულად ვთანამშრომლობთ. ბევრი ქართველი სტუდენტი სწავლობს უნგრეთში და ეს მიმართულება კიდევ უფრო უნდა გაძლიერდეს, რადგან ეს არის ჩვენთვის ერთ-ერთი რეალური გზა ევროპაში ინტეგრირებისკენ.
ასევე ვისაუბრეთ იმაზე, ენერგეტიკის სფეროში, რა მიმართულებით შეიძლება უფრო აქტიური თანამშრომლობა. ასევე, IT და ისეთი სფეროები, როგორიც არის ეკოლოგია, რომელიც, ისევე როგორც ჩემთვის, ბატონი პრეზიდენტისთვისაც ერთ-ერთი პრიორიტეტია. ძალიან დიდი მადლობა ბატონო პრეზიდენტო თქვენი დღევანდელი სტუმრობისთვის და გითმობთ ახლა სიტყვას“,-განაცხადა ზურაბიშვილმა.