საპარლამენტო უმრავლესობის ლიდერის, გია ვოლსკის თქმით, დასაფასებელია მისწრაფება იმისკენ, რომ საზოგადოებამ მეტი შეიტყოს განვლილი საქმიანობისა და მომავალი გეგმების შესახებ. როგორც მან „ქართული ოცნების“ ფრაქციების სხდომაზე განაცხადა, სადაც პრემიერ-მინისტრობისა და მინისტრობის კანდიდატებს უსმენენ, პარლამენტში ისეთ მოვლენებსაც განხილვების დროს ადგილი, რომელიც ამ პროცესს არ უხდება.
„დასაფასებელია მოთმინება, კონსტრუქციულობა და მისწრაფება იმისკენ, რომ საზოგადოებას რაც შეიძლება მეტი, რაც შეიძლება ვრცელი ინფორმაცია მივაწოდოთ, არა მარტო განვლილი საქმიანობის, არამედ მომავალი გეგმების შესახებ, რაც უნდა გახდეს მთავარი რესურსი იმისა, რომ მთავრობამ დაიმსახუროს, კანდიდატებმა დაიმსახურონ უმრავლესობის მხარდაჭერა და არა მარტო პარლამენტში, არამედ საზოგადოებაში.
აღარ შევეხები პერიპეტიებს, რომელთაც, სამწუხაროდ, ამ შენობაში ჰქონდა ადგილი და რომელიც აბსოლუტურად არ უხდება არც შინაარსით, არც თავისი ისტორიით იმ განხილვებს, რისთვისაც შევიკრიბეთ.
სამწუხაროდ, უნდა ითქვას, რასაკვირველია არავის ვადანაშაულებ, მაგრამ მედიაც რეალურად იძულებული იყო ფაქტობრივად სკანდალურ თემებზე გადართულიყო მაშინ, როდესაც ძალიან საინტერესო მიმართულებებზე იყო საუბარი ამ დარბაზში, ყველა საკითხთან დაკავშირებით – განათლება, თავდაცვა, შინაგან საქმეთა სამინისტროს საქმიანობის მომავალი ხედვები, ეკონომიკის თუ ინფრასტრუქტურის საკითხებთან დაკავშირებით, კონფლიქტების მოგვარებისა და შერიგების საკითხებთან დაკავშირებით, სოფლის მეურნეობის ძალიან საინტერესო თემები იყო განხილული, სოციალური და ჯანდაცვის თემები.
ვფიქრობ, დღევანდელი დღე და განსაკუთრებით ხვალინდელი, უნდა იყოს ჩვენი წარმატებული მცდელობა. დარწმუნებული ვარ ამ წარმატებაში. კიდევ მეტი ვილაპარაკოთ ამოცანებზე, რომელიც მომავალი მთავრობის წინაშე დგას“, – განაცხადა ვოლსკიმ ფრაქციის სხდომაზე.