მოქალაქეს, სადაც არ უნდა ცხოვრობდეს, ქალაქსა თუ სოფელში, არ აინტერესებს ჩვენი პროგრამები, რეფორმები და გეგმები, მისთვის სახელმწიფოს განსახიერება არის რიგითი სახელმწიფო მოხელე, რომელიც ხშირ შემთხვევაში, ვერ ასრულებს ან ასრულებს მის დაკვეთას, უგვარებს ყოველდღიურ პრობლემებს, – ამის შესახებ საქართველოს პრემიერ-მინისტრობის კანდიდატმა გიორგი გახარიამ პარლამენტში განაცხადა, სადაც მთავრობისთვის ნდობის გამოცხადების საკითხს განიხილავენ.
„გუშინაც ვთქვი და დღესაც მინდა გავიმეორო, ჩვენ ძირითადად ორიენტირებული ვიქნებით საქმეზე, შედეგიანობასა და ეფექტურობაზე. ეს იქნება ჩვენი ძირითადი პრინციპები და კარგად გვესმის ხალხის შეფასება, ხალხის ხმა იქნება ჩვენი ძირითადი მაკოორდინირებელი ძალა. ჩვენ ასევე გვესმის, რომ მოქალაქეს, სადაც არ უნდა ცხოვრობდეს, ქალაქსა თუ სოფელში, არ აინტერესებს ჩვენი პროგრამები, რეფორმები და გეგმები, მისთვის სახელმწიფოს განსახიერება არის რიგითი სახელმწიფო მოხელე, რომელიც ხშირ შემთხვევაში, ვერ ასრულებს ან ასრულებს მის დაკვეთას, უგვარებს ყოველდღიურ პრობლემებს. მიზნის მისაღწევად, ყველას უნდა გვესმოდეს, რომ ყველამ უნდა ვიმუშაოთ და ვიშრომოთ ერთად, მთავრობამ, პარლამენტმა, ხელისუფლებამ, მათ შორის ოპოზიციამაც და რა თქმა უნდა, მოქალაქეებმაც. სხვანაირად ჩვენს მიზანს, წარმატებულ ხვალინდელ დღეს ვერ მივაღწევთ.
ამასთან, ჩვენი ძირითადი პრინციპი იქნება ეფექტიანობა, ქმედითი ღონისძიებები, რათა შევუმსუბუქოთ ჩვენს მოქალაქეს საკმაოდ მძიმე ყოფა. რა თქმა უნდა, ყველაზე მნიშვნელოვანი პრინციპი იქნება გონივრული ვადა. შეუძლებელია, არ ვუთხრათ ჩვენს მოქალაქეს, რას ვაკეთებთ, რა გეგმა გვაქვს და როდის იქნება შესრულებული. ასევე კიდევ ერთი მნიშვნელოვანი პრინციპი ეს იქნება კეთილსინდისიერება. უნდა გვესმოდეს, რომ ეფექტურობა გონივრულ ვადაში და კეთილსინდისიერება იქნება ძირითადი პრინციპი. კეთილსინდისიერებასთან ბმაში მინდა ხაზგასმით აღვნიშნო, რომ ყველა სახის კორუფციასთან ბრძოლა იქნება პრიორიტეტი ჩვენი მთავრობისთვის. ეს არ არის გასაკვირი, რადგან ჩვენს მსგავს გარდამავალ ეკონომიკებში სუსტი ინსტიტუტიებით კორუფციასთან ბრძოლა უნდა იყოს მუდმივი პროცესი და ეს პრიორიტეტი ყოველდღიურად უნდა იდგეს ჩვენ წინაშე. შესაბამისად, ჩვენი მიზანი იქნება ეფექტური, გონიერი, სამართლიანი და რაც მთავარია, კეთილსინდისიერი ბიუროკრატია“, – განაცხადა გიორგი გახარიამ.
მისივე თქმით, დიდი პრობლემაა, როდესაც სიცრუით და მოდელირებული რეალობით ხდება მოქალაქეებზე ზემოქმედება.
„არის კიდევ ერთი პრინციპი, რომელზე საუბარიც მაიძულა ბოლო დღეებში, თუნდაც პარლამენტში მიმდინარე მოვლენებმა და, რომლის გარეშეც ალბათ ქვეყნის განვითარებაზე საუბარი იქნება ზედმეტი, ეს არის სიმართლე. დიდი პრობლემა გვაქვს, როდესაც სიცრუით და მოდელირებული რეალობით ხდება ჩვენს მოქალაქეებზე ელემენტარული ზემოქმედება, მათ ფსიქიკასა და მორალზე. ეს არის დამანგრეველი ძალა, რომელიც ქმნის ილუზიებს, როდესაც ხდება სიცრუით სიმართლის ჩანაცვლება, როდესაც უბრალოდ არ ვაძლევთ საშუალებას მოქალაქეს, ობიექტური რეალობა შეაფასოს ისე, როგორც არის, მით უმეტეს, მაშინ, როდესაც ობიექტური რეალობა სახარბიელო არ არის, ეს იწვევს უდიდეს დეპრესიას, ქმნის უდიდეს დაძაბულობას ქვეყანაში ყველა მიმართულებით, ეს ელემენტარულად ხელს უშლის ქვეყნის პოზიტიურ განვითარებას“, – განაცხადა გიორგი გახარიამ.